Yeola Politics : भुजबळ काका-पुतण्यांनी थेट फडणवीसांकडे फील्डींग लावली, येवल्यात अखेर राष्ट्रवादी-भाजप युतीची घोषणा

Yeola Politics : येवला नगरपालिका निवडणुकीसाठी राष्ट्रवादीचे माजी खासदार समीर भुजबळ यांच्याकडून भाजपसोबत युतीचे प्रयत्न सुरु होते. परंतु भाजप नगराध्यक्षपदासाठी आडून बसले होते. परंतु अखेर समीर भुजबळांच्या प्रयत्नांना यश आले असून येवल्यात राष्ट्रवादी व भाजपची युती झाली आहे.

येवला नगरपालिका निवडणुकीच्या पार्श्वभूमीवर आज उमेदवारी अर्ज दाखल करण्याच्या शेवटच्या दिवशी मोठ्या राजकीय घडामोडी घडल्या. एकीकडे छगन भुजबळांना शह देण्यासाठी शिवसेना(शिंदे गटाचे) आमदार किशोर दराडे व राष्ट्रवादी शरदचंद्र पवार पक्षाचे नेते माणिकराव शिंदे यांनी एकत्र येत शहर विकास आघाडीची घोषणा केली. तर दुसरीकडे माजी खासदार समीर भुजबळ यांच्या नेतृत्वाखाली राष्ट्रवादी कॉंग्रेस पार्टी व भाजपच्या युतीची घोषणा करण्यात आली.

भाजप व राष्ट्रवादीकडून नगराध्यक्ष पदासाठी राष्ट्रवादी कॉंग्रेस पार्टीचे उमेदवार उपमहाराष्ट्र केसरी राजेंद्र लोणारी यांचा उमेदवारी अर्ज दाखल करण्यात आला. तर शिवसेना शिंदे गट व राष्ट्रवादी शरदचंद्र पवार पक्षाच्या वतीने रुपेश दराडे यांचा उमेदवारी अर्ज दाखल करण्यात आला.

महायुतीच्या वतीने राष्ट्रवादी कॉंग्रेस पार्टीचे राजेंद्र लोणारी यांचा उमेदवारी अर्ज दाखल करतांना माजी खासदार समीर भुजबळ, भाजपचे जेष्ठ नेते लक्ष्मण सावजी, राष्ट्रवादी कॉंग्रेस पार्टीचे ज्येष्ठ नेते अंबादास बनकर, माजी जिल्हा परिषद अध्यक्ष राधाकिसन सोनवणे, प्रदेश सरचिटणीस दिलीप खैरे, माजी नगराध्यक्ष हुसेन शेख, भाजपनेते बंडू क्षीरसागर, पप्पू सस्कर, आनंद शिंदे, मनोज दिवटे, राष्ट्रवादी कॉंग्रेस पार्टीचे विधानसभा अध्यक्ष वसंत पवार, शहराध्यक्ष दिपक लोणारी यांच्यासह महायुती घटक पक्षातील पदाधिकारी उपस्थित होते.

येवल्यात भाजपने राष्ट्रवादीसोबत युती करावी यासाठी राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी थेट राज्याचे मुख्यमंत्री देवेंद्र फडणवीस यांच्याशी चर्चा केली होती. भुजबळ व फडणवीस यांच्या चर्चेनंतर येवला नगरपालिका निवडणूक ही भाजप व राष्ट्रवादीने एकत्र लढण्याचा निर्णय घेण्यात आला आहे.

त्यामुळे आता येवला नगरापालिका निवडणुकीचे चित्र स्पष्ट झाले. भुजबळांना बालेकिल्ल्यात शह देण्यासाठी दराडे बंधूंनी माणिकराव शिंदेंना सोबत घेतलं आहे. तर छगन भुजबळांनी भाजपला सोबत घेतले आहे. त्यामुळे येवल्याची लढत मोठी रंगतदार होणार हे निश्चित.