Chhagan Bhujbal : कृषी मंत्री माणिकराव कोकाटे यांनी भुजबळांना पुन्हा डिवचले...

Nashik News: नाशिक मधून छगन भुजबळ यांना मंत्रिपदाची संधी मिळाली नाही. राष्ट्रवादी काँग्रेस पक्षाने माणिकराव कोकाटे यांना मंत्री केले. यावर कृषिमंत्री कोकाटे आणि छगन भुजबळ यांच्यातील राजकीय टोलेबाजी अद्यापही सुरूच आहे. कृषिमंत्री कोकाटे यांनी माजी मंत्री छगन भुजबळ यांच्याकडून मंत्रिपदासाठी सुरू असलेल्या दबावाच्या राजकारणावर टीका केली आहे.

ते म्हणाले, छगन भुजबळ (Chhagan Bhujbal) यांच्या दृष्टीने त्यांचे कुटुंब हेच एकमेव ओबीसी आहेत. विशेष म्हणजे स्वतः भुजबळ आणि त्यांचा पुतण्या हेच केवळ ओबीसी आहेत, अशा अविर्भावात त्यांची वर्तणूक सुरू आहे. अन्य कोणी ओबीसी त्यांना दिसतच नाही. या शब्दात मंत्री कोकाटे यांनी भुजबळ यांचा पुन्हा एकदा समाचार घेतला आहे.

यावेळी कृषिमंत्री कोकाटे म्हणाले, राष्ट्रवादी काँग्रेस (NCP) पक्षाने आजवर छगन भुजबळ यांना न्याय दिला आहे. त्यांना जी संधी दिली आहे, तशी आजवर कोणालाही दिलेली नाही. त्यामुळे भुजबळ यांनी योग्य बोध घेतला तर ते चांगले होईल.

ग्रामीण भागात गावागावांत मराठा आणि ओबीसींसह (OBC) सर्व समाज एकत्र वावरतात. त्यांच्यातील संबंध अतिशय चांगले आहेत. ते सगळे एकत्रितपणे काम करतात. त्यांचा एकमेकांवर विश्वास आहे. या मध्ये तेढ निर्माण करणे आणि समाजा समाजात फूट पाडणे हे राजकारण मला पटणारे नाही.

राज्य सरकार मध्ये सध्या ४२ मंत्री आहेत यातील १७ मंत्री ओबीसी घटकांतून येतात. १६ मंत्री मराठा समाजाचे आहेत. अशा स्थितीत ओबीसी समाजाला सर्वाधिक न्याय देण्याचा प्रयत्न मुख्यमंत्र्यांनी केला आहे. त्यांनी घेतलेली भूमिका स्वागत करावे अशी आहे. असे असतानाही भुजबळ मात्र ओबीसींवर अन्याय झाला असे सांगतात हे ढोंग मला अजिबात मान्य नाही भुजबळ यांना मंत्रिपद न दिल्याने पक्षाकडून कोणतीही चूक झालेली नाही. त्यांना मंत्रिपद मिळावे यासाठी आपण मध्यस्थी किंवा चर्चा करणार नसल्याचेही त्यांनी स्पष्ट केले.