Advay Hiray Vs Dada Bhuse : अद्वय हिरेंना दादा भुसेंचा पुन्हा धक्का, खेचून आणली सत्ता!

Advay Hiray Vs Dada Bhuse : विधानसभा निवडणुकीत दादा भुसे विरुद्ध अद्वय हिरे यांच्यातील लढत ही काटे की टक्कर होईल, अशी शक्यता वर्तवली जात होती. मात्र, मालेगाव बाह्य मतदारसंघात झालेली ही लढत एकतर्फी झाली. तब्बल दीड लाखांपेक्षा अधिक मताधिक्क्याने दादा भुसे यांनी अद्वय हिरे यांचा पराभव केला. या पराभवाला तीन महिने पूर्ण होण्या आधीच भुसेंना पुन्हा एकदा अद्वय हिरेंना धक्का दिला आहे.

मालेगाव बाजार समिती ही नाशिक जिल्ह्यात प्रतिष्ठित मानली जाते. या समितीची सत्ता हिरेंकडे होती. मात्र, हिरे यांच्याकडील सत्ता दादा भुसे यांनी खेचून आणली आहे. समितीच्या सभापतीमधी एकनाथ शिंदेंच्या सभापतीपदी चंद्रकांत शेवाळे यांची बिनविरोध निवड झाली आहे. तर, अरुण सोनजकर यांची उपसभापतीपदी निवड झाली आहे.

हिरे यांची सत्ता संपुष्टात आणून दादा भुसे यांनी आपल्या करिष्मा विधानसभा निवडणुकीनंतर पुन्हा एकदा दाखवून दिला. बाजार समितीवर तब्बल 15 वर्ष भुसे गटाची सत्ता होती मात्र मागील निवडणुकीत हिरे यांच्या गटाने 18 पैकी 14 जागांवर विजय मिळवत सत्ता आपल्याकडे खेचून आणली होती. मात्र यावेळी भुसेंनी हिरेंना जोरदार धक्का दिला.

अशी आणली सत्ता

अद्वय हिरेंचे सहा समर्थक हे निवडणुकीच्या आधी दादा भुसेंच्या गटात सामील झाले होते. तसेच बाजार समितीच्या कार्यकाळात मासिक सर्वसाधारण सभांना गैरहजर समितीचे तत्कालीन सभापती अद्वय हिरे यांचे सदस्यत्व रद्द करण्यात आले. यानंतर आज (सोमवारी) सभापती आणि उपसभापतीपदाची निवडणूक पार पडली. त्यात 18 पैकी तब्बल 14 संचालक भुसे गटात आल्याने सत्ता परिवर्तन झाले.