Devendra Fadnavis : नाशिकबाबत फडणवीसांनी टाकली 'गुगली' म्हणाले, युती केली तर युतीचे 'शंभर'

Nashik Politics : आगामी स्थानिक स्वराज्य संस्थाच्या निवडणुकांच्या तयारीसाठी भाजपने तयारी सुरु केली असून उत्तर महाराष्ट्रामधील पक्षाच्या प्रचाराची रणनीती ठरवण्यासाठी स्वत:मुख्यमंत्री देवेंद्र फडणवीस यांच्या उपस्थितीत आढावा बैठक झाली. फडणवीसांनी भाजप नेते, पदाधिकाऱ्यांना मार्गदर्शन केलं.

दरम्यान फडणवीसांनी माध्यमांशी संवाद साधला. ते म्हणाले. आमचे अध्यक्ष रवी चव्हाण यांनी पुढे येऊ घातलेल्या स्थानिक स्वराज्य संस्थांच्या निवडणुकांच्या दृष्टीने विभागवार बैठका घेतल्या आहेत. महानगरपालिका, जिल्हापरिषद, नगरपालिका, नगरपंचायत यासंदर्भातला आढावा आम्ही घेत आहोत. तेथील संघटनात्मक परिस्थिती, बुथरचना, तेथील मागच्या निवडणुकीतील परिस्थिती आता काय परिस्थिती आहे. युती कशी करायची, युती कुठे कुठे होऊ शकते याचा आढावा घेत आहोत.

आज नाशिक विभागात उत्तर महाराष्ट्राचा आढावा घेतला आहे. उत्तर महाराष्ट्रातल्या महानगरपालिका, जिल्हा परिषदा आणि ज्या काही नगरपालिका, नगरपंचायती आहे यासंदर्भात आमच्या कार्यकर्त्यांचे संपूर्ण म्हणणे ऐकुन घेतले. त्यांना पुढचे दिशादर्शन देखील केले. मला असं वाटतं की उत्तर महाराष्ट्रात मागच्यावेळी स्थानिक स्वराज्य संस्थांच्या निवडणुकांमध्ये आम्हाला फार चांगले यश मिळाले होते. यावेळी त्याही पेक्षा चांगले यश मिळेल अशी अपेक्षा आहे.

महायुती होणार का या प्रश्नावर फडणवीस म्हणाले, आम्ही तिन्ही पक्षांनी पहिल्या दिवसापासून ठरवले आहे की, जिथे जिथे शक्य आहे तिथे आम्ही महायुती करणार आहोत. जिथे आम्ही तुल्यबळ पक्ष आहोत. त्याठिकाणी आम्ही मैत्रीपूर्ण लढत करु असं फडणवीस म्हणाले. नाशिकमध्ये भाजपने शंभर प्लसचा नारा दिला आहे. त्यापार्श्वभूमीवरही फडणवीस यांनी एक गुगली टाकली. आम्ही युती केली तर युतीचे शंभर असे फडणवीस म्हणाले. त्यामुळे नाशिकमध्ये युती होणार की स्वबळावर नक्की काय हा संभ्रम कायम राहिला.

नाशिकमधील गुन्हेगारीवर बोलताना ते म्हणाले, मी स्वत:पोलिस आयुक्तांना पूर्ण मोकळीक दिली आहे. पोलिसांचे अतिशय चांगल्या पद्धतीने काम चालले आहे. कोणी कुठल्याही पक्षाचा असो मग तो भाजपचा असो की महायुतीमधील अन्य पक्षाचा की विरोधी पक्षाचा असो कुणालाही सोडू नका असे अधिकार पोलिसांना दिले आहेत असं फडणवीस म्हणाले.

काही लोक राजाश्रय देण्याचा प्रयत्न करतात. अशा सर्व गोष्टींना मोडीत काढण्याचा आम्ही निर्णय घेतला आहे. कुणाची काहीही पार्श्वभूमी असो पण आता जर कुणी गुन्हेगारीत आढळेल त्याला आम्ही सोडणार नाही.