Dhule News, 18 Jun : विधिमंडळ अंदाज समितीचा धुळे दौरा शासकीय अधिकाऱ्यांनाही भोवण्याची चिन्हे आहेत. शिवसेना एकनाथ शिंदे पक्षाचे आमदार अर्जुन खोतकर यांच्यावरील संशयाची सुई अद्याप दूर झालेली नाही. आता या तपासाचा विस्तार आणखी वाढला आहे.
धुळे शासकीय विश्रामगृहावर कक्ष क्रमांक 102 मध्ये 1.84 कोटींची बेशोबी रोकड सापडली होती. शिंदेंच्या शिवसेनेचे आमदार अर्जुन खोतकर यांचे स्वीय सहाय्यक अनिल पाटील यांच्या खोलीत ही रक्कम होती. त्यामुळे हे प्रकरण राजकीय दृष्ट्या चांगलेच तापले आहे. पोलिसांनाही आता त्यात नवीन माहिती मिळाली आहे.
शिवसेना उद्धव ठाकरे पक्षाचे नेते माजी आमदार अनिल गोटे यांनी याबाबत स्टिंग ऑपरेशन केले होते. या खोलीत 5 कोटी रुपये असल्याचा त्यांचा दावा होता. विधिमंडळ अंदाज समितीचे अध्यक्ष आमदार खोतकर आणि अन्य आमदारांना वाटण्यासाठी 15 कोटी रुपयांचे टारगेट देण्यात आले होते असा खळबळजनक आरोप त्यांनी केला होता.
ही रक्कम असल्याचे कळल्यावर आमदार अनिल गोटे विश्रामगृहावर ठिय्या देऊन बसले होते. त्यांनी आमदार खोतकर यांच्या स्वीय सहाय्यकाच्या खोलीला कुलूप लावले. त्यानंतर मुख्यमंत्री देवेंद्र फडणवीस यांपासून तर जिल्ह्याच्या पोलीस अधीक्षकांपर्यंत सर्व यंत्रणांना माहिती कळविली.
आता याबाबत धुळे पोलीस तपास करीत आहेत. पोलीस अधीक्षक श्रीकांत धीवरे यांनी या तपासात लक्ष घातले आहे. विश्राम गृहावरील सीसीटीव्ही फुटेज ताब्यात घेण्यात आले होते. या फुटेज मध्ये 11 संशयित निश्चित करण्यात आले आहेत. हे संशयित कोण हे निश्चित करण्यासाठी विविध शासकीय कार्यालयात पोलीस अधिकाऱ्यांकडे खातरजमा करीत आहेत.
त्यामुळे शासकीय अधिकाऱ्यांची देखील झोप उडाली आहे. सीसीटीव्ही फुटेजमध्ये आढळलेले 11 संशयित पैसे जमा करणारे की पैसे घेण्यासाठी आलेले याचा शोध घेतला जात आहे. यामध्ये शासकीय कर्मचाऱ्यांचा समावेश असल्याने राजकीय नेतेही चांगलेच अडचणीत येण्याची शक्यता आहे. त्यामुळे विधिमंडळ अंदाज समितीचे अध्यक्ष आमदार अर्जुन खोतकर यांच्यावरील संशयाची सुई अद्याप दूर झालेली नाही.
धुळे रोकड गैर व्यवहार प्रकरण चांगलेच गाजत आहेत. प्रकरणाची चर्चा होऊ नये आणि तपास फारसा पुढे जाऊ नये यासाठी पडद्यामागून मंत्रालयातील एक मोठी लॉबी कार्यरत असल्याचे बोलले जाते. मुख्यमंत्री देवेंद्र फडणवीस यांनी याबाबत एसआयटीची घोषणा केली होती. त्यामुळे या हाय प्रोफाईल प्रकरणात कोण अडकतो याची चर्चा काल पुन्हा सुरू झाली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.