Girish Mahajan : कुंभनगरी नाशिकच्या ध्वजवंदनाचा मान गिरीश महाजन यांनाच, मग दादा भुसेंना कुठे पाठवलं?

Nashik Politics : शिवसेना शिंदे गटाच्या नाराजीमुळे रायगड आणि नाशिक या दोन्ही जिल्ह्यातील पालकमंत्रिपदाचा तिढा अद्याप कायम आहे. नाशिकला मंत्री गिरीश महाजन यांचे नाव पालकमंत्री म्हणून जाहीर करण्यात आले होते. मात्र शिवसेनेच्या दादा भुसे यांना डावलण्यात आल्याने शिवसैनिकांनी महाजन यांच्या नावाला कडाडून विरोध केला. परिणामी महाजन यांचे पालकमंत्रीपद स्थगित करण्यात आले होते.

दरम्यान ७७ व्या प्रजासत्ताक दिनाच्या पार्श्वभूमीवर मुख्यमंत्री देवेंद्र फडणवीस यांच्याकडील सामान्य प्रशासन विभागाने प्रजासत्ताक दिनाच्या शासकीय ध्वजवंदनाबाबत परिपत्रक जारी केले आहे. त्यानुसार नाशिकमध्ये शासकीय ध्वजवंदनाचा मान कुंभमेळामंत्री गिरीश महाजन यांनाच देण्यात आला आहे. मुख्यमंत्री देवेंद्र फड़णवीस यांनी यासंदर्भात यादी जाहीर केली. पालकमंत्र्यांच्या हस्ते ध्वजवंदनाचा प्रघात असल्याने महाजन हेच नाशिकचे पालकमंत्री होण्याचे संकेत मिळाले आहेत.

दरम्यान नाशिकच्या पालकमंत्री पदासाठी असलेले दुसरे इच्छुक अर्थात शालेय शिक्षणमंत्री दादा भुसे यांना अमरावती येथे शासकीय ध्वजवंदनाचा मान मिळाला आहे. त्यामुळे नाशिकमध्ये कुंभमेळा मंत्री गिरीश महाजन यांच्याच हातून ध्वजवंदनाचा कार्यक्रम होणार हे स्पष्ट झालं आहे. त्यामुळे पुन्हा एकदा नाशिकच्या राजकीय वर्तुळात महाजन हेच अघोषित पालकमंत्री असल्याच्या चर्चा रंगू लागल्या आहे.

मागच्या वर्षी मुख्यमंत्री देवेंद्र फडणवीस यांनी जानेवारी महिन्या दावोस दौऱ्यावर जाण्यापूर्वी राज्यातील ३६ जिल्ह्यांचे पालकमंत्री घोषित केले होते. त्यात नाशिकच्या पालकमंत्रिपदी जलसंपदामंत्री गिरीश महाजन, तर रायगडच्या पालकमंत्रिपदी महिला व बालकल्याण विकासमंत्री अदिती तटकरे यांची नियुक्ती केली होती. मात्र या दोन्ही नावांना शिवसेनेने विरोध केला होता.

नाशिकमध्ये शिवसेनेचे दादा भुसे समर्थक आक्रमक झाले होते. तर रायगडमध्ये भरत गोगावले यांच्या समर्थकांनी त्याविरोधात मोठे रान उठवले होते. तिथे गोगावले व अदिती तटकरे यांच्यात पालकमंत्रीपदावरुन वाद कायम आहे. मागच्यावेळी पालकमंत्रीपदासाठी स्थगिती देण्यात आली असतानाही महाराष्ट्र दिन आणि स्वातंत्र्यदिनी आदिती तटकरे यांना झेंडावदनाची संधी दिली होती. तेव्हापासून गोगावले अस्वस्थ होते.

मात्र, यावेळी ध्वजावंदनाची संधी मिळावी म्हणून आग्रही असलेल्या भरत गोगावले यांची इच्छापूर्ती झाली आहे. यंदा प्रजासत्ताकदिनी रायगड जिल्हा मुख्यालयात त्यांच्या हस्ते ध्वजवंदन होणार आहे. मात्र, गोगावले यांची इच्छापूर्ती ही औटघटकेची ठरेल असे राष्ट्रवादीच्या नेत्यांकडून अर्थात तटकरे समर्थकांकडून सांगण्यात येत आहे. रायगडप्रमाणे नाशिकमध्ये देखील अद्याप पालकमंत्रीपदाचा निर्णय झालेला नाही. अशात दादा भुसे यांना अमरावतीला पाठवून महाजन यांना नाशिकमध्ये ध्वजवंदनाचा मान देण्यात आल्याने पुन्हा चर्चांना जोर आला आहे.