Girish Mahajan : 'मी अजून तरुणच, म्हातारा नाही', आमदार देवयानी फरांदेंच्या वक्तव्याला प्रत्युत्तर देताना गिरीश महाजन कार्यकर्त्यांसमोरच म्हणाले...

Nashik News, 18 Sep : जलसंपदा मंत्री गिरीश महाजन यांना भाजपचे संकट मोचक म्हणून संबोधले जाते. त्याचे त्यांना देखील समाधान वाटते. विरोधकांना प्रत्युत्तर देण्यासाठी ते सतत पुढे असतात.

सध्या पंतप्रधान नरेंद्र मोदी यांच्या वाढदिवसानिमित्त सेवा पंधरवडा साजरा होत आहे. यासंदर्भात जलसंपदा मंत्री गिरीश महाजन (Girish Mahajan) यांनी बुधवारी पक्षाच्या कार्यकर्त्यांना संबोधित केले. यावेळी शहरातील सर्व पदाधिकारी आणि आमदार देवयानी फरांदे, आमदार राहुल ढिकले हे देखील उपस्थित होते.

या कार्यक्रमात बोलताना आमदार देवयानी फरांदे मंत्री गिरीश महाजन हे तरुणांपेक्षाही अधिक उत्साहाने काम करतात असे म्हणाल्या. आमदार फरांदे बोलण्याचा उशीर की, मंत्री महाजन जागेवरून उभे राहिले आणि त्यांनी त्यांचा माईक घेत उत्साहात म्हणाले, "मी तरुणच आहे", मी म्हातारा झालो नाही. मी ज्येष्ठ देखील नाही. मी अद्यापही तरुण आहे.

कार्यकर्त्यांच्या मेळाव्यातच हा प्रकार घडला. त्यावर आमदार फरांदे यांनी त्यांना सजग करण्याचा प्रयत्न केला. आपण कार्यकर्त्यांसमोर बोलत आहात, असे त्यांनी मंत्री महाजन यांना सुनावले. त्यावर मात्र गिरीश महाजन सावरले आणि त्यांनी तातडीने विषयांतर केले.

माझे वय झाले असले तरीही मी तरुण आहे. रोज व्यायाम करतो. मी आणि आमदार मंगेश चव्हाण मरीन ड्राईव्हला जॉगिंग करतो. एकदा जॉगिंग करताना मंगेश चव्हाण मागे राहिले. मात्र ते पक्षाच्या कार्यालयात बोलावल्याने तिकडे गेले होते. अर्थात टॅक्सीने गेले.

महाजन यांच्या खुलासे वजा वक्तव्याने कार्यकर्त्यांमध्ये मात्र चांगलीच चर्चा झाली. मंत्री महाजन उत्साहाच्या भरात बोलून गेले. मात्र, या निमित्ताने पत्रकारांना पक्षाचे आमदार आणि मंत्री यांच्यात झालेल्या शाब्दिक वादाचा विषय सापडला.

आगामी महापालिका निवडणुकीच्या पार्श्वभूमीवर त्यांनी विरोधकांना डिवचले. निवडणुका जवळ आल्याने ते सक्रिय होण्याचा प्रयत्न करीत आहेत. मात्र विरोधी पक्षांना नगरसेवकांची दोन अंकी संख्याही गाठता येणार नाही, असे आव्हान त्यांनी यावेळी दिले.