Nashik NMC Election : गिरीश महाजनांची शंभर पाऊले माघार, नाशिकमध्ये मारली मोठी पलटी

Nashik Politics : आगामी कुभमेळा नाशिकमध्ये असल्याने महापालिका निवडणुकीत कोणत्याही परिस्थिीत भाजपला सत्ता आणायची आहे. त्यासाठी कुंभमेळा मंत्री असलेल्या गिरीश महाजन यांनी फार आधीच 'शंभर प्लसचा' नारा दिला होता. अर्थात भाजपचे शंभरहुन अधिक नगरसेवक निवडून आणू असा तो नारा होता.

गिरीश महाजन यांनी आपले शंभर प्लसचे उद्दिष्ट डोळ्यासमोर ठेऊन नाशिकमध्ये त्यासाठी मोठे इनकमिंग घडवून आणले होते. शिवसेना ठाकरे पक्षासह विरोधी पक्षांचे अनेक मोठे मासे गळाला लावत महाजन यांनी त्यांना भाजपत प्रवेश दिला. काही वादग्रस्त नेत्यांना तर स्थानिक आमदारांचा विरोध जुगारुन महाजन यांनी प्रवेश दिला होता.

परंतु आता प्रत्यक्षात महापालिका निवडणुकीचा बिगुल वाजला असताना मात्र गिरीश महाजन यांनी शंभर पाऊले माघार घेतल्याचे दिसत आहे. आता त्यांचे म्हणणे आहे की, शंभर प्लसचा नारा भाजपचा नव्हे तर महायुतीचा असल्याचे महाजन यांनी नमूद केले. शंभर प्लस एकट्या भाजपचे नव्हे तर युतीचे निवडून आणायचे असल्याचे म्हणत गिरीश महाजन यांनी आता पलटी मारली आहे.

त्यामुळे आता भाजप शंभर प्लस नव्हे तर महायुतीचे शंभर प्लस असा पवित्रा महाजन यांनी घेतला आहे. दरम्यान भाजपचे स्थानिक नेते मात्र स्वबळावर लढण्यासाठी आग्रही आहेत. २०१७ प्रमाणेच आताही स्वतंत्र लढावे अशी स्थानिक पदाधिकाऱ्यांची व इच्छुक उमेदवारांची इच्छा असून भाजप शहराध्यक्ष सुनिल केदार यांनी तसे पक्षश्रेष्ठींना कळवले आहे. त्यामुळे स्थानिक नेत्यांची वेगळी भाषा आणि पक्षश्रेष्ठींची वेगळी अशी परिस्थिती आहे.

एकीकडे भाजपचे शहराध्यक्ष आणि आमदार देवयानी फरांदे हे सगळ्या १२२ जागांवर कमळ फुलवण्याची भाषा करत आहे. स्थानिक पदाधिकारी, इच्छुकांचीही तीच इच्छा आहे. परंतु त्यावरुनही मंत्री गिरीश महाजन यांनी स्थानिक नेत्यांचे कान टोचले. पक्षाचा स्वबळाचा निर्णय घेण्याचा अधिकार स्थानिक नेत्यांना नसून वरिष्ठ पातळीवर युतीची चर्चा सुरु असल्याचे महाजन म्हणाले. आम्हाला महायुती म्हणून निवडणूक लढवण्याची इच्छा असल्याचे गिरीश महाजन म्हणाले.