Girish Mahajan : काय होतास तू, काय झालास तू, अरे येड्या कसा वाया गेलास तू?.. गिरीश महाजनांनी केली खडसेंवर कविता

Jalgaon Politics : नगरपालिका निवडणुकीच्या पार्श्वभूमीवर राष्ट्रवादी शरदचंद्र पवार पक्षाचे ज्येष्ठ नेते एकनाथ खडसे आणि भाजप नेते गिरीश महाजन यांच्याकडून एकमेकांवर टीकेचे बाण सुटताना दिसत आहेत. आता गिरीश महाजन यांनी खडसेंवर बोचऱ्या शब्दात टीका केली आहे. दोघांमध्ये चांगलीच जुंपली आहे.

गिरीश महाजन यांच्या सारखा मी वाया गेलो नाही. गिरीश महाजन किती वाया गेला हे तुम्हाला माहिती आहे. कितीतरी ठिकाणी त्यांनी संबंध ठेवलेले आहेत. लोकांनाही ते माहिती आहे. संजय राऊत म्हणतात महाजन हा जामनेरचा सांड आहे. मी आता यावर बोलत नाही पण नंतर बोलेल असं सांगत खडसेंनी महाजन यांच्यावर टीका केली होती. आता एकनाथ खडसेंच्या टीकेवर गिरीश महाजनांनी जोरदार प्रत्युत्तर दिले आहे.

गिरीश महाजन म्हणाले की, मी वाया गेलेला माणूस आहे असे खडसे म्हणाले. यावर मी काय बोलू? सध्या त्या माणसाला स्वतःचे चिन्ह काय आहे ते देखील समजत नाही. भुसावळ, रावेर, मुक्ताईनगरला ते वेगळे सांगतात. जिथे जातील तिथे वेगळे सांगतात. काय होता माणूस, काय झाला, कसा वाया गेला? संपूर्ण राज्यभरात आश्चर्य व्यक्त होत आहे. मुख्यमंत्री पदाच्या रेसमधला माणूस असा काय वागतोय? आमच्या पक्षात तुमचा परिवार कसा घालतात, तुम्ही तुमचे काम करा ना असही महाजनांनी सुनावलं.

महाजन पुढे म्हणाले, माणूस राजकारणात दुर्बुद्धी सुचली की कुठून कुठे जातो याचे उदाहरण म्हणजे खडसे आहे. लोकसभेला सुनेचे काम करतो म्हटले आणि कमळ हाती घेतले. विधानसभेला तुतारी वाजवली. आता भुसावळला गेले तर म्हणतात घड्याळाला मतदान करा. कधी म्हणतात मशालीला मतदान करा. त्यांचा पक्ष कोणता हेच कळत नाहीत. त्यांना चिन्ह कोणते हे विचारा. तब्येत, वयोमानानुसार ते बोलताय असं टोला महाजनांनी लगावला.

एकनाथ खडसे यांचे अस्तित्व काही राहिले नाही. त्यांचे राजकारण संपले आहे. माणूस इतका कसा लाचार होऊ शकतो. सर्व पक्षाचे चिन्ह घेऊ शकतो. राजकारणात असा माणूस बघितला नाही. काय होतास तू, काय झालास तू, अरे येड्या कसा वाया गेलास तू अशी कविता करत गिरीश महाजनांनी खडसेंची खिल्ली उडवली.