Girish Mahajan Politics : खडसेंविरोधात आंदोलनात भाजप कार्यकर्त्यांनी हद्द ओलांडली ; गिरीश महाजन म्हणाले, हे योग्य नाही..

Jalgaon political news : राष्ट्रवादी शरदचंद्र पवार पक्षाचे जेष्ठ नेते एकनाथ खडसे यांचे जावई प्रांजल खेवलकर हे पुण्यातील रेव्ह पार्टी प्रकरणात सध्या न्यायालयीन कोठडीत आहे. दरम्यान महिला आयोगाने याप्रकरणात उडी घेतली. आयोगाच्या अध्यक्षा रुपाली चाकणकर यांनी खडसेंचे जावई प्रांजल यांच्याविरोधात गंभीर आरोप केले. त्यावरुन एकनाथ खडसेंनी रुपाली चाकणकर यांना प्रत्युत्तर देत त्यांच्यावर टीका केली होती. खडसे यांनी 'त्या' चेकाळल्या असल्याचं वक्तव्य केलं होतं. त्याविरोधात भाजपच्या कार्यकर्त्यांनी खडसेंविरोधात जळगावात आंदोलन केलं.

भाजप कार्यकर्त्यांनी खडसेंच्या फोटोला जोडे मारले. यावेळी भाजपच्या काही कार्यकर्त्यांकडून गैरवर्तन झाल्याचे समोर आले. यावेळी एक कार्यकर्ता खडसेंच्या प्रतिमेवर चक्क थुंकला. यासंदर्भात मंत्री गिरीश महाजन यांना माध्यम प्रतिनिंधींनी प्रश्न विचारले. तेव्हा त्यावर उत्तर देताना महाजन म्हणाले. हे योग्य नाही, असं करता कामा नये, अशी प्रतिक्रिया महाजन यांनी दिली.

गिरीश महाजन पुढे म्हणाले, या बाबतीत मला काहीच माहिती नाही. मी उत्तराखंड मध्ये गेली चार दिवस झाले होतो. पण हे योग्य नाही. असं करता कामा नये असं महाजन म्हणाले. दरम्यान खडसेंविरोधात भाजपने केलेल्या आंदोलनावर रक्षा खडसे यांनी प्रतिक्रिया दिली होती. त्या म्हणाल्या की..मलाही आता वेदना होत आहेत, कुठे तरी राजकारण थांबलं पाहीजे. कुठल्या पातळीवर हे राजकारण जातंय..त्यावर विचारलं असता महाजन म्हणाले, रक्षा खडसे यांचे म्हणणे बरोबर आहे.

दरम्यान जळगाव राष्ट्रवादी शरद पवार गटातर्फे एकनाथ खडसेंच्या समर्थनार्थ आंदोलन करण्यात आलं. खडसेंच्या प्रतिमेवर दुग्धाभिषेक करत भाजपच्या आंदोलनाला उत्तर देण्यात आले. तसेच यावेळी खडसेंच्या समर्थनार्थ शरद पवार गटाच्या वतीने जोरदार घोषणाबाजी करण्यात आली. त्यामुळे वातावरण आता अधिकच चिघळलं आहे. खडसेंच्या समर्थनार्थ राष्ट्रवादी शरद पवार गट मैदानात उतरला आहे तर चाकणकर यांच्या समर्थनार्थ भाजपच्या महिला पदाधिकारी मैदानात उतरल्या.

त्यामुळे प्रांजल खेवलकर प्रकरणाचे पडसाद जळगाव जिल्ह्यात पडत असून त्यातून एकनाथ खडसे आणि मंत्री गिरीश महाजन यांच्यातील वाद आता टोकाला गेल्याचं पाहायला मिळत आहे. त्यात रुपाली चाकणकर यांनी उडी घेतल्यापासून अधिकच या वादाला धार आली. दरम्यान राष्ट्रवादी अजित पवार गटाच्या काही नेत्यांनी दोन्ही बाजूने हा वाद थांबवावा असे आवाहन केले आहे.