Honey Trap : गिरीश महाजनांच्या बचावासाठी जीवाभावाचा सहकारी आला धावून, खडसेंना म्हटला 'भिकारी'..

Eknath Khadse : जळगाव जिल्ह्याच्या राजकारणात एकनाथ खडसे व गिरीश महाजन यांच्यातील वाद सर्वश्रुत आहे. कोणत्या न कोणत्या कारणावरुन दोघांकडून सातत्याने एकमेकांवर आरोप-प्रत्यारोप केले जातात. सध्या हनी ट्रॅप प्रकरणात मुंबई पोलिसांच्या अटकेत असलेल्या प्रफुल्ल लोढावरुन दोघांमध्ये युद्ध रंगले आहे. या युद्धात गिरीश महाजन यांच्या बचावासाठी त्यांचा जीवाभावाचा सहकारी म्हणून ओखळ असलेल्या खान्देशच्या एका आमदाराने उडी घेतली आहे.

मंत्री गिरीश महाजनांवर एकनाथ खडसेंकडून आरोप केले जात असताना चाळीसगावचे भाजप आमदार मंगेश चव्हाण यांनी गिरीश महाजन यांची बाजु घेत एकनाथ खडसेंवर हल्लाबोल केला आहे. एकनाथ खडसेंवर टीका करताना यावेळी मंगेश चव्हाण यांची जीभ घसरली. ते म्हणाले, एकनाथ खडसे हा मात्तबर नेता होऊ शकत नाही तो भिकारी नेता आहे. अर्धवट माहितीच्या आधारे नेत्यांची बदनामी करत आहे. जिल्ह्याचे नाव ते बदनाम करत आहे. याबाबत पत्रकार परिषदेत घेऊन त्यात सविस्तर भूमिका मांडू असे आमदार चव्हाण म्हणाले.

योग्य वेळ आल्यानंतर त्यांना थांबवण्यासाठी योग्य गोळ्या दिल्या जातील असा इशारा त्यांनी खडसेंना दिला. गिरीश महाजन यांची खडसे बरोबरी करु शकत नाही. गिरीश महाजन यांनी स्वत:चे नेतृत्व कामातून सिद्ध केलं आहे. सर्व धुळे, जळगाव, नाशिक या सगळ्याच ठिकाणी त्यांनी एकहाती सत्ता मिळवली आहे. खडसेंना ते करता आलं नाही. मी पणाच्या अहंकारात त्यांनी बरीच वर्ष घातली. चाळीस वर्षे राजकारणात त्यांनी जे काम केलं ते स्वतःसाठी आणि परिवारासाठीच त्यांनी काम केलं. पक्षाचे ते कधीच झाले नाही. ते गेल्यापासून एकहाती सत्ता यायला सुरुवात झाली असं चव्हाण म्हणाले.

एकनाथ खडसे हे सपाट पावले आहेत. त्यांच्या हातून ग्रामपंचायत सुद्दा गेली. त्यांच्या गावात परिसरात त्यांना कुठेही पत राहीली नाही.

खडसेंना कोणी आडवा आलं कायम त्यांनी त्याला आडवं केलं. खडसेंना फार महत्व देण्याची गरज नाही. अलिकडच्या काळात त्यांनी तर हद्दच केली आहे. नेत्यांच्या परिवारावर जायचं, नेत्यांना खालच्या स्तरावर जावून बदनाम करायचं काम त्यांनी केलं. एकनाथ खडसे खरंच आपल्या आईचं दूध पिले असतील तर त्यांनी सर्व पुरावे जनतेसमोर आणावे असा हल्ला चव्हाण यांनी चढवला.

किती वर्ष तुम्ही असे खोटे आरोप कराल. खडसेंनी त्यांच्या राजकीय आयुष्यात जेवढे आरोप केले ते एकही सिद्ध करू शकले नाही. एकनाथ खडसे म्हणजे तत्कालीन तोडीपाणी विरोधी पक्षनेता आहे, असे शरद पवार आणि राज ठाकरे यांचे शब्द आहेत. एकनाथ खडसे हे सपाट पावले आहे. एकनाथ खडसे यु टर्न करणारा सरडासारखा माणूस आहे. त्याचे हे रंग समाजासमोर आणावे लागतील, ते आम्ही आणू. अती तिथे माती ही एक म्हण आहे तसच एकनाथ खडसेंचं झालं आहे, अशी घणाघाती टीका मंगेश चव्हाण यांनी केली.

प्रफुल्ल लोढा चे प्रकरण वेगळं दिसतंय आणि हनी ट्रॅप प्रकरण जे सांगताय ते वेगळ दिसतंय. मात्र तुमच्या कडे पुरावे असतील तर ते मांडावे. प्रफुल्ल लोढा प्रकरणात 17 वर्षाच्या अल्पवयीन मुलीने तक्रार दिली आहे. तो हनीट्रॅपचा प्रकार नसून तो बलात्काराचा प्रकार आहे. वर्षांची मुलगी हनीट्रॅप मध्ये कशी असेल. त्यामुळे दोन्ही प्रकरणं वेगळी आहेत. एकनाथ खडसेंना सध्या कुणीही विचारत नाही. म्हणून त्यांचा हा धंदा आहे. अशा पद्धतीने सनसनाटी निर्माण करण्याचा प्रयत्न ते करत आहेत, असा टोला आमदार चव्हाण यांनी लगावला.