Mahayuti Politics: गुलाबराव पाटील बोलून गेले अन् काही तासात एसएमएस आले, साखर, गहू, तांदूळ घ्या मोफत!

Municiple Elections News: नगरपालिका निवडणुकीचा प्रचार शिगेला पोहोचला आहे. सत्ताधारी महायुतीकडून आश्वासनांची खैरात सुरू आहे. यातच मतदारांमध्ये गोंधळ निर्माण होईल असे प्रकार पुढे येत आहेत.

दोन दिवसांपूर्वी पाणीपुरवठा मंत्री गुलाबराव पाटील यांनी केलेले विधान वादाचा विषय ठरले होते. मतदानाच्या आधी सगळ्यांनी अंगणात झोपावे. लक्ष्मी तुमच्यावर प्रसन्न होईल, असे मंत्री म्हणाले होते.

शिवसेना एकनाथ शिंदे पक्षाचे मंत्री गुलाबराव पाटील यांचे हे विधान वादाचा विषय ठरले. विरोधी पक्षाच्या नेत्यांनी त्यावर आक्षेप नोंदवला. हा मतदारांना भ्रमित करण्याचा प्रकार असल्याची टीका झाली होती.

यासंदर्भात मुख्यमंत्री आणि उपमुख्यमंत्री एकनाथ शिंदे यांनाही विचारणा करण्यात आली. उपमुख्यमंत्री एकनाथ शिंदे यांनी गुलाबराव पाटील यांना सावरून घेतले. मंत्री पाटील यांच्या विधानाचा तसा अर्थ लावू नये, असे ते म्हणाले होते.

मात्र मंत्री गुलाबराव पाटील बोलून गेले आणि काही तासातच एसएमएस आले. या एसएमएस मध्ये असलेल्या मजकुराने मतदारांचा गोंधळ झाला. आता या गोंधळावर नव्याने चर्चा सुरू झाली आहे.

दारिद्रय रेषेखालील नागरिकांना मोफत धान्य दिले जाते. त्याचा कधी एसएमएस येत नाही. मात्र निवडणुकीच्या पार्श्वभूमीवर हजारो नागरिकांना मोफत धान्य घ्या असे एसएमएस आले आहे. अगदी श्रीमंतांनाही हे मेसेज आले आहेत. त्यामुळे मतदारांमध्ये गोंधळ वाढला.

राष्ट्रीय अन्नसुरक्षा योजनेअंतर्गत मोफत धान्य घेऊन जावे. नोव्हेंबर महिन्यासाठी चार किलो ज्वारी चार किलो गहू आणि १२ किलो तांदूळ मोफत घ्यावा. त्याची पावती घ्यावी. संदर्भासाठी १८००२२४९५० आणि १८००२२१९६७ हा हेल्पलाइन नंबर देखील देण्यात आला आहे. या क्रमांकावर फोन केल्यावर मात्र तो कोणीही उचलत नाही. सुचिता अतुल सिंग हाडा असे नाव हेल्पलाइन नंबर फिरवल्यावर येते.

नगरपालिका निवडणुकीचे मतदान तोंडावर आहे. अशा स्थितीत सत्ताधारी पक्षाचे सर्वच नेते प्रचारात लाडकी बहीण योजनेचा गाजावाजा करीत आहेत. त्यातच मोफत धान्याचे एसएमएस संबंध नसलेल्या नागरिकांनाही येत आहे. त्यामुळे निवडणुकीत चालले तरी काय? असा प्रश्न विचारला जाऊ लागला आहे.

------