Suresh Jain: सुरेश जैनांनी केला भाजपच्या कारभाराचा पंचनामा! गिरीश महाजनांचे वाभाडेच काढले

Jalgaon News: जळगाव शहर आणि जिल्ह्याच्या राजकारणावर ज्येष्ठ नेते सुरेश जैन यांचा प्रदीर्घकाळापासून वरचष्मा राहिला आहे. शिवसेना उद्धव ठाकरे पक्षाचे ते नेते होते. सध्या मात्र ते सक्रिय राजकारणापासून अलिप्त आहेत.

महापालिका निवडणुकीच्या पार्श्वभूमीवर जैन यांनी आपली प्रतिक्रिया व्यक्त केली आहे. या प्रतिक्रियेने भाजपची झोप उडवणारी अशी स्थिती आहे. भाजपच्या कामकाजावर गंभीर प्रश्नचिन्ह सुरेश जैन यांनी उपस्थित केले आहेत.

जळगावला सिंगापूर करायचे होते. जळगावचे पॅरिस करण्याचे स्वप्न पाहिले जात होते. मात्र आजही शहर कुठे पोहोचले आहे? त्याची काय अवस्था आहे? असा प्रश्न जैन यांनी उपस्थित केला.

जळगाव शहरातील सुविधा आणि कामकाज यावर जैन यांनी आपली खंत व्यक्त केली. शहराची दुरावस्था झाली आहे. सिंगापूर आणि पॅरिस झाले नाही मात्र जळगाव हे आता एक खेडे झाले आहे, अशा सूचक शब्दात जळगावच्या कारभाऱ्यांना जैन यांनी घरचा आहेर दिला आहे.

जळगाव महापालिकेत भाजप सत्तेत होती. तीन वर्षांपूर्वी येथे मोठ्या प्रमाणात सत्तांतर झाले. महापौरांसह अनेकांनी एका रात्रीत पक्ष बदलला. निवडणुकांच्या पार्श्वभूमीवर हे सर्व नेते पुन्हा भाजप पक्षात परतले आहेत. मंत्री गिरीश महाजन यांनी त्यांच्यासाठी रेड कार्पेट अंथरले. जोरदार स्वागत केले.

सत्तेसाठी भाजप कोणालाही प्रवेश द्यायला तयार असतो, अशी टीका विरोधकांकडून होते. विरोधकांचे कार्यकर्ते आणि नेते साम दाम दंड भेद मार्गाने फोडणे आणि त्यांना भाजप पक्षात प्रवेश देणे अशी राजकीय वाटचाल सुरू आहे. पुन्हा एकदा जळगाव महापालिकेत भाजपला सत्ता हवी आहे. या पार्श्वभूमीवर जळगावच्या विकासात अत्यंत महत्त्वाची भूमिका बजावणाऱ्या सुरेश जैन यांची प्रतिक्रिया आली आहे. या प्रतिक्रियेने सत्ताधाऱ्यांच्या कामकाजाचा पंचनामाच झाला. त्यामुळे तो चर्चेचा विषय आहे.