Maharashtra Politics : जळगावच्या राजकारणात भाजपचे मंत्री गिरीश महाजन व राष्ट्रवादी शरदचंद्र पवार पक्षाचे जेष्ठ नेते एकनाथ खडसे हे दोघे कट्टर विरोधक आहेत. दोघे भाजपमध्ये असताना दोघांमधील संबध अधिक ताणले गेले. त्यानंतर खडसे राष्ट्रवादीत गेल्यानंतरही दोघांमधील वाद कायम राहीला.
मध्यंतरी झालेल्या हनी ट्रॅप प्रकरणात खडसेंनी महाजनांना टार्गेट करण्याचा प्रयत्न केला. पण त्यानंतर काही दिवसातच खडसेंचे जावई प्रांजल खेवलकर यांच्या पुण्यातील रेव्ह पार्टी प्रकरणामुळे महाजनांनाही खडसेंना टार्गेट करण्यासाठी नवीन मुद्दा मिळाला. त्यानंतर दोघांमध्ये पुन्हा आरोप-प्रत्यारोपांचे सत्र रंगले.
त्यानंतर पुन्हा वातावरण शांत झालंय असं वाटत असताना खडसेंच्या सुन व केंद्रीय राज्य मंत्री रक्षा खडसे यांच्या पेट्रोल पंपावर सशस्त्र दरोडा पडला. त्यावरुन आमदार खडसे यांनी जिल्ह्यातील गुन्हेगारांना राजकीय संरक्षण मिळत असल्याचा आरोप केला. त्यावरुन महाजन यांनी खडसेंच्या संपत्तीवर भाष्य केल्याने पुन्हा एकदा दोघांमधील वाद पेटण्याची चिन्हे दिसून आली.
आता आगामी स्थानिक स्वराज्य संस्थांच्या निवडणुकांच्या पार्श्वभूमीवर जळगावात गिरीश महाजन यांनी पुन्हा एकदा कंबर कसली आहे. या दरम्यान आता जुने किस्सा सांगत गिरीश महाजन यांनी त्यांचे कट्टर विरोधक असलेल्या एकनाथ खडसे यांना पुन्हा डिवचलं आहे. आपण कशा प्रकारे खडसेंच्या कन्या रोहिणी खडसे यांचा पराभव केला ते गिरीश महाजनांनी सांगितलं.
गिरीश महाजन म्हणाले, विधानसभा निवडणुकीच्या वेळेला खडसेंनी माझ्यावर भरपूर तोंडसुख घेतले. नको ते आरोप केले. पण मी सांगितलं होतं तुम्हाला जेवढ्या शिव्या द्यायच्या त्या एकदा देऊन घ्या...मी फक्त एकदा शेवटच्या दिवशी येईल आणि तुमची खाट पाडून टाकेल. अगदी त्याप्रमाणे मी निवडणूक प्रचाराच्या शेवटच्या दिवशी गेलो. एकच रात्र थांबलो आणि मुक्ताईनगरची खाटच पाडली. खडसेंनी कोट्यवधी रूपये खर्च करूनही मी शेवटच्या दिवशी त्यांचा बरोबर कार्यक्रम केला.
मी-मी म्हणणाऱ्यांचे काय हाल झाले. त्यांची मुलगी दोनवेळा लागोपाठ निवडणुकीत पडली. मी म्हणजे भाजप, मी म्हणजे पक्ष या गुरमित राहिले. आता कशाचे काय राहिले नाही. पक्ष होता म्हणून तुम्ही होते. आता तुमची किंमत झिरो झाली आहे. दूध संघात त्यांच्या पत्नीचा पराभव झाला. त्यांच्याकडे काहीच राहिलं नाही. बॅंक राहिली नाही, दूध संघ राहिला नाही. नगरपालिका राहिली नाही. आमदारकी राहिली नाही. मी पक्षापेक्षा मोठा आहे अशी हवा जेव्हा डोक्यात जाते तेव्हा तुम्ही मातीत जातात असा टोला गिरीश महाजन यांनी खडसेंना लगावला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.