Gulabrao Patil on NCP : 'दोन्ही राष्ट्रवादी एकत्रच, दोघांमध्ये 'आय लव यू''; मंत्री गुलाबराव पाटलांची 'स्टाईल'मध्ये प्रतिक्रिया

Jalgaon Shiv Sena news : शिवसेना मंत्री गुलाबराव पाटील हे त्यांच्या हजरजबाबी स्टाईलसाठी ओळखले जातात. एखादा प्रश्न त्यांना विचारल्यानंतर तेवढ्यात तत्परतेने ते उत्तर देतात. त्यांचे ती प्रतिक्रिया बेधडक असते.

शिवसेना ठाकरे पक्ष आणि मनसे एकत्र आंदोलन करत असतानाच, दोन्ही पवार एकत्र येत आहेत, यावर मंत्री गुलाबराव पाटील यांनी त्यांच्या हजरजबाबी स्टाईलमध्ये प्रतिक्रिया दिली.

मंत्री गुलाबराव पाटील यांनी शरद पवार (Sharad Pawar) आणि अजित पवार यांच्या राष्ट्रवादी काँग्रेस पक्ष एकत्र येण्यावर प्रतिक्रिया दिली. ते म्हणाले, "दोन्ही राष्ट्रवादी एकत्रच आहे. त्यांचा दोघांमध्ये 'आय लव यू' आहे, अशी प्रतिक्रिया प्रश्न विचारताच क्षणात मंत्री गुलाबराव पाटील यांनी दिली. मंत्री गुलाबराव यांच्या हजरजबाबी प्रतिक्रियेमुळे तिथं आजूबाजूच्या कार्यकर्त्यांमध्ये आणि पदाधिकाऱ्यांमध्ये एकच हशा पिकला.

हिंदी सक्तीवरून राज ठाकरे आणि उद्धव ठाकरे (Uddhav Thackeray) एकत्र येणार असून याला आमचा विरोध नाही, मराठी ही आमची भाषा आहे. हिंदी भाषेबाबत सामूहिक निर्णय झाला पाहिजे. मला नाही वाटत की याबाबत कोणाचा विरोध असेल, असे सांगताना एकनाथ शिंदे यांच्यावर संजय राऊत यांनी केलेल्या टीकेला मंत्री गुलाबराव पाटील यांनी जोरदार प्रत्युत्तर दिलं.

हिंदी सक्तीवरून एकनाथ शिंदे आता कुठे लपून बसले आहेत, अशी टीका संजय राऊत यांनी केली होती. मंत्री गुलाबराव पाटील यांनी संजय राऊतांना प्रत्युत्तर देताना म्हटले, एकनाथ शिंदे तुझ्या छाताड्यावर आहेत. तू अजून शुद्धीवर आला नाही का सोन्या? असा प्रश्न करत मंत्री गुलाबरावांनी संजय राऊतांना सुनावलं.

स्थानिक स्वराज्य संस्थांच्या निवडणुकीत महायुती जागा वाटपावर चर्चा कशी होणार, शिवसेना पक्ष वेगळी भूमिका घेणार का? यावर बोलताना, मंत्री गुलाबराव पाटील यांनी महापालिकेच्या जागा वाटपाबाबत शिवसेनेचे नेते उपमुख्यमंत्री एकनाथ शिंदे जो निर्णय घेतील, त्या निर्णयानुसार काम करू. जागा वाटपाबाबत राज्याची पॉलिसी महायुती आणि शिवसेनेचे नेते उपमुख्यमंत्री एकनाथ शिंदे ठरवेल. एखादा जिल्हाध्यक्ष बोलल्याने काही होत नाही.