Manikrao Kokate : माणिकराव पडले आजारी, भाऊ विजय कोकाटे कुणाच्या डोक्यातच नाही ; नाशिक पोलिस निघाले हुडकायला

Nashik Politics : तीस वर्षांपूर्वीच्या एका प्रकरणात राष्ट्रवादीचे नेते माणिकराव कोकाटे यांच्या अडचणी वाढल्या आहे. बनावट कागदपत्रे सादर करून आर्थिक दुर्बल घटकातील शासकीय सदनिका लाटल्याप्रकरणात कोकाटे व त्यांचे बंधू विजय कोकाटे यांना नाशिक जिल्हा न्यायालयाने दोन वर्षांच्या कारावासाची शिक्षा कायम ठेवली आहे. त्यामुळे कोकाटे यांना मोठा धक्का बसला असून त्यांच्यावर पक्षाने कारवाई केली आहे. कोकाटे यांच्याकडी सर्व खाती काढून घेण्यात आली आहेत.

नाशिक न्यायालयाने मंत्री माणिकराव कोकाटे यांच्याविरुद्ध अटक वॉरंट जारी केले आहे. मात्र माणिकराव कोकाटे सध्या रुग्णालयात उपचार घेत असल्याने त्यांना तात्पुरता दिलासा मिळाला असून, नाशिक पोलिसांनी आता त्यांचे बंधू विजय कोकाटे यांचा शोध सुरु केला आहे.

नाशिकच्या प्रथम वर्ग न्यायालयाच्या न्यायमूर्ती रुपाली नरवाडिया यांनी बुधवारी (ता. १७) माणिकराव कोकाटे आणि त्यांचे बंधू विजय कोकाटे यांच्याविरोधात अटक वॉरंट बजावले आहे. न्यायालयाच्या आदेशानंतर पोलिसांनी सुरुवातीला कोकाटे यांना ताब्यात घेण्यासाठी हालचाली सुरु केल्या. हायकोर्टात शिक्षेला स्थगिती मिळेपर्यंत कोकाटे यांच्यावर अटकेची टांगती तलवार आहे. परंतु माणिकराव कोकाटे हे आजारी पडले असून रुग्णालयात दाखल झाले आहेत. त्यामुळे पोलिसांनी त्यांचा मोर्चा कोकाटे यांचे बंधू विजय कोकाटे यांच्याकडे वळवला आहे.

विजय कोकाटेंना शोधून काढण्यासाठी पोलिसांचे सर्च ऑपरेशन सुरु झाले आहे. विजय कोकाटे हे सध्या कुठे आहेत, याची कुणालाही माहिती नाही. माणिकराव कोकाटे यांच्यासोबतच विजय कोकाटे यांनाही शासकीय सदनिका लाटल्याप्रकरणात दोन वर्षांच्या कारावासाची शिक्षा सुनावण्यात आली असून, त्यांच्यावरही अटक वॉरंट लागू आहे. त्यामुळे विजय कोकाटे पोलिसांच्या हाती लागता का हे पाहावे लागणार आहे.

नेमकं प्रकरण आहे तरी काय ?

कमी उत्पन्न असणाऱ्या व्यक्तीला मुख्यमंत्री कोट्यातून सदनिका घेताना स्वतःच्या नावावर कुठेही सदनिका नसल्याचे प्रतिज्ञापत्र व आवश्यक माहिती सादर करावी लागते, असे असताना मंत्री कोकाटे व त्यांचे बंधू विजय कोकाटे यांनी 1995 ते 1997 या कालावधीत खोटी कागदपत्रे सादर करून नाशिक शहरात मुख्यमंत्री कोट्यातून दोन सदनिका प्राप्त केल्या. त्या वेळी त्यांनी आपले उत्पन्न कमी असल्याचे आणि स्वतःकडे अन्य कोणतेही घर नसल्याची माहिती शासनाला दिली होती. या आधारे त्यांना शासनामार्फत सदनिका मंजूर करण्यात आल्या.

मात्र सदनिका मिळवण्यासाठी कागदपत्रांमध्ये फेरफार करून शासनाची फसवणूक करण्यात आल्याचा आरोप कोकाटे यांच्यावर करण्यात आला. 1995 साली माजी मंत्री तुकाराम दिघोळे यांनी यासंदर्भात तक्रार दिली होती. त्यानुसार कोकाटे यांच्यावर गुन्हा दाखल करण्यात आला होता. न्यायालयात हा खटला सुरु होता. तीन वर्षांनी न्यायालयाने निकाल देत कोकाटे बंधूंना शिक्षा सुनावली.

माजी मंत्री दिघोळे यांनी दाखल केलेल्या याचिकेच्या आधारे नाशिकच्या सरकारवाडा पोलीस ठाण्यात गुन्हा दाखल करण्यात आला होता. 1997 पासून हे प्रकरण न्यायप्रविष्ट होते. दिघोळे यांची कन्या अंजली दिघोळे यांनी हे प्रकरण लावून धरलं. अखेर न्यायालयाने माणिकराव कोकाटे आणि त्यांचे बंधू विजय कोकाटे या दोघांना दोषी ठरवत प्रत्येकी दोन वर्षांची कारावासाची शिक्षा आणि 50 हजार रुपयांचा दंड ठोठावला आहे.