Manikrao Kokate: हायकोर्टाचाही कोकाटेंना दणका! तातडीच्या सुनावणीस दिला नकार; कोणत्याही क्षणी अटकेची शक्यता

Manikrao Kokate Convicted : खोट्या कागदपत्रांच्या आधारे सरकारी सदनिका हडप केल्याप्रकरणी नाशिक सत्र न्यायालयानं राज्याचे क्रीडा मंत्री माणिकराव कोकाटे यांना दोन वर्षांची शिक्षा सुनावली आहे. तसंच त्यांच्याविरोधात अटक वॉरंट देखील काढलं आहे. त्यामुळं अटक टाळण्यासाठी कोकाटे यांनी मुंबई हायकोर्टात अपिल केलं असून तातडीनं सुनावणी घेत सत्र न्यायालयाच्या निर्णयाला स्थगिती देण्याची मागणी त्यांनी केली आहे. पण हायकोर्टानं देखील त्यांना दणका दिला असून तातडीच्या सुनावणीस नकार दिला आहे. त्यामुळं कोकाटेंना आता कोणत्याही क्षणी अटक होण्याची शक्यता आहे.

हायकोर्टात काय घडलं?

माणिकराव कोकाटे यांच्यावतीनं अॅड. अनिकेत निकम यांनी तातडीची सुनवाई घेण्यासाठी न्यायालयाकडे अर्ज केला होता. न्यायमूर्ती लढ्ढा यांच्या खंडपीठासमोर या अर्जावर युक्तिवाद झाला. यावेळी कोकाटेंचे वकील उपस्थित होते. यावेळी हायकोर्टानं कोकाटेंना तातडीची सुनावणी नाकारत कोकाटेंना दिलासा देण्यास नकार दिला. तर या अर्जावर 19 डिसेंबरला सुनावणी होईल असं सांगितलं. त्यामुळं सुनावणीला दोन दिवसांचा कालावधी बाकी असल्यानं कोणत्याही क्षणी कोकाटेंना अटक होण्याची शक्यता आहे.

आमदारकी रद्द होणार?

जर एखाद्या लोकप्रतिनिधीला कुठल्याही कोर्टानं फौजदारी गुन्ह्यात दोन किंवा त्यापेक्षा जास्त वर्षांची शिक्षा सुनावली तर त्याच पद रद्द होतं. लोकप्रतिनिधी कायदा १९५१च्या कायद्यात हा नियम आहे. हा कायदा आमदार-खासदार दोघांनाही लागू आहे. याच कायद्यान्वये राहुल गांधी यांची २०२४ मध्ये खासदारकी विधानसभा अध्यक्षांनी रद्द केली होती. त्यानुसार, जर विधीमंडळ सचिवालयाला नोटीशीद्वारे कोकाटेंची आमदारकी रद्द करण्याचा अधिकार आहे.

मंत्रिपद जाणार?

हायकोर्टानं तातडीस सुनावणीला नकार दिल्यानं आता कोकाटेंच्या अटकेबरोबरच आमदारकी आणि मंत्रिपदही जाण्याची शक्यता आहे. पण या कारवाईसाठी संबंधित यंत्रणा किती वेगानं कार्य करतात यावर या गोष्टी अवलंबून असणार आहेत. त्यामुळं जर १९ तारखेला कोकाटेंच्या अर्जावर सुनावणी होऊन जर हायकोर्टानं शिक्षेला स्थगिती दिली तर कोकाटेंवरील ही सर्व संकटं दूर होऊ शकतील.

रुग्णालयात दाखल

कोर्टाकडून शिक्षेचा आदेश आल्यानंतर माणिकराव कोकाटे हे प्रकृती अस्वास्थ्याचं कारण देत आता रुग्णालयात दाखल झाले आहेत. त्यामुळं हायकोर्टातील अर्जावर दोन दिवसांनी सुनावणी होईपर्यंत कोकाटे आता रुग्णालयात उपचार घेतील. त्यानंतरही जर हायकोर्टानं शिक्षेला स्थगिती देण्यास नकार दिला तर मात्र कोकाटेंना सुप्रीम कोर्टाचा दरवाजा ठोठावावा लागेल त्यानंतरच जो निर्णय येईल त्यानुसार कोकाटेंना कारवाईला सामोरं जावं लागू शकतं.