Nashik BJP News : बडगुजर तर सीमा हिरेंचे विरोधक, मग ढिकले आणि फरांदे का उभे राहिले हिरेंच्या पाठीशी?

Nashik Politics : शिवसेना ठाकरे गटाने हकालपट्टी केलेल्या सुधाकर बडगुजर यांचा भाजप प्रवेश जवळपास आता निश्चित मानला जात आहे. मात्र नाशिक पश्चिम विधानसभा मतदारसंघाच्या आमदार सीमा हिरे यांचा बडगुजर यांच्या प्रवेशाला विरोध कायम आहे. आता नाशिकच्या पूर्व व मध्य विधानसभेच्या दोन्ही आमदारांनीही सीमा हिरे यांना साथ दिली आहे.

नाशिक पश्चिम विधानसभा मतदारसंघात ठाकरे गटाकडून सुधाकर बडगुजर व भाजपकडून सीमा हिरे यांच्यात विधानसभेला लढत झाली होती. त्यात सीमा हिरे यांनी बडगुजर यांचा पराभव केला होता. त्यावेळी दोघांमध्ये टोकाचा संघर्ष पाहायला मिळाला. त्यामुळे बडगुजर यांचा भाजपमध्ये प्रवेश झाल्यास हिरे यांच्या राजकीय स्थानाला धक्का लागू शकतो. दोन्ही कट्टर स्पर्धी मानले जात असल्याने सीमा हिरे यांचा बडगुजर यांना होणारा विरोध स्वाभाविक आहे. मग उरलेल्या दोन आमदारांची सीमा हिरेंना साथ का मिळाली असावी असा प्रश्न निश्चितच पडतो.

त्याचे कारण असे आहे की, आगामी महापालिका निवडणूक लक्षात घेता बडगुजर यांच्यासह विधानसभेत बंडखोरी केलेल्या माजी नगरसेवकांनाही भाजपमध्ये प्रवेश देण्याची तयारी सुरु आहे. यामध्ये पूर्व विधानसभा मतदारसंघात महाविकासआघाडीकडून निवडणूक लढविलेले स्थायी समीतीचे माजी सभापती गणेश गिते यांचाही प्रवेश होण्याची शक्यता आहे. नाशिक पूर्व विधानसभा मतदारसंघात आमदार राहुल ढिकले यांच्याविरोधात गणेश गिते यांनी बंडखोरी केली होती. त्यामुळे ढिकले यांचा गिते यांच्या प्रवेशाला विरोध आहे.

तर, नाशिक मध्य विधानसभा मतदारसंघात डॉ. हेमलता पाटील या देवयानी फरांदे यांच्या विरोधी मानल्या जातात. बडगुजर यांच्या निमित्ताने पाटील यांच्याही भाजपप्रवेशाची चर्चा आहे. त्यामुळे फरांदे यांनी त्यांच्या प्रवेशाला आक्षेप घेतला आहे. बडगुजर यांच्या प्रवेश सोहळ्यात होणारं हे इनकमिंग तिन्ही आमदारांची डोकेदुखी वाढवणारं व त्यांच्या राजकीय अस्तित्वाला धक्का पोहचवणारं असल्याने तिन्ही आमदारांनी या आयारामांच्या प्रवेशाविरोधात एकत्रित दंड थोपाटले आहेत.

एवढ्या एक-दोन दिवसांत हा प्रवेश सोहळा होणार असल्याचे सांगितले जात आहे. त्यामुळे स्थानिक तिन्ही आमदार अस्वस्थ असून त्यांनी एकत्र येत हा प्रवेश सोहळा रोखण्याची तयारी सुरु केली आहे. त्यासाठी ते मुख्यमंत्री देवेंद्र फडणवीस यांची भेटही घेणार असल्याचे बोलले जात आहे. आमदार सीमा हिरे यांनी देखील तशी माहिती दिली आहे.