Nashik Politics : शिवसेना ठाकरे गटाचे नाशिक महानगरप्रमुख विलास शिंदे पक्षात नाराज असल्याचे बोलले जात आहे. त्यांनी एकाच आठवड्यात दोनवेळा शिवसेना शिंदे गटाचे प्रमुख एकनाथ शिंदे यांची भेट घेतल्याने त्यांच्या पक्षांतरांच्या चर्चा सुरु आहेत. दरम्यान विलास शिंदे हे आज खासदार संजय राऊत यांच्या भेटीसाठी त्यांच्या मैत्री निवासस्थानी दाखल झाले. त्यांनी काल राऊत यांच्या भेटीची वेळ मागितली होती.
त्यामुळे आज संजय राऊत व विलास शिंदे या दोघांच्या भेटीमध्ये नेमकी काय चर्चा होते हे पाहणे महत्वाचे आहे. नाशिकसह सर्व राजकीय वर्तुळाचे लक्ष या भेटीकडे लागले आहेत. विलास शिंदे हे शिंदे गटात जाण्याचा निर्णय घेतात की स्वगृहीच राहतात याबाबत उत्सुकता लागली आहे. आगामी महापालिका निवडणुकीच्या दृष्टीने शिंदे यांची भूमिका पक्षासाठी महत्वाची ठरणार आहे.
पक्षविरोधी भूमिका घेतल्याने ठाकरे पक्षाने गेल्या आठवड्यात उपनेते सुधाकर बडगुजर यांची हकालपट्टी केली. त्यापूर्वी बडगुजर यांनी आपल्यासह विलास शिंदे हे देखील पक्षात नाराज असल्याचं म्हटलं होतं. त्यामुळे शिंदे यांच्या पक्षांतराच्या चर्चा सुरु झाल्या. दरम्यान विलास शिंदे यांनी आपल्या मुलीच्या विवाह सोहळ्याला उपमुख्यमंत्री एकनाथ शिंदे यांना निमंत्रण दिले. एकनाथ शिंदे हे देखील विवाहसोहळ्याला आले होते. दरम्यान एकनाथ शिंदेंनी शेवटी शिंदे हे शिंदेकडेच जाणार असे भाष्य केल्याने शिंदेच्या पक्षांतराच्या चर्चांना अधिकच जोर आला.
त्यानंतर त्याच आठवड्यात एकनाथ शिंदे हे पुन्हा आपल्या पक्षातील कार्यकर्त्यांच्या विवाह सोहळ्याच्या निमित्ताने नाशिकमध्ये आले. त्यावेळी विलास शिंदे यांनी दुसऱ्यांदा एकनाथ शिंदे यांची भेट घेतली. त्यांचे स्वागतही केले. त्यामुळे विलास शिंदे यांच्या शिंदे गटात जाण्याच्या चर्चा सुरु झाल्या. शिवाय दत्ता गायकवाड यांची उपनेते पदी निवड झाल्यानंतर ठाकरे सेनेचे सगळे पदाधिकारी मातोश्रीवर उद्धव ठाकरेंना भेटण्यासाठी गेले होते. त्यात विलास शिंदे मात्र नव्हते. त्यामुळे ते खरोखर पक्षात नाराज आहेत का? असतील तर नेमकं का नाराज आहेत. यासह ते पक्ष सोडण्याचा काही निर्णय घेतात का या प्रश्नांची उत्तरे राऊत व शिंदे यांच्या भेटीत मिळण्याची शक्यता आहे.
राऊत यांच्या भेटीपूर्वी माध्यमांशी बोलताना शिंदे यांनी बडगुजर यांच्यावर निशाणा साधला आहे. ते म्हणाले, पक्षामध्ये सुधाकर बडगुजर यांना संजय राऊत यांनी लहान भावापेक्षाही जास्त प्रेम दिलं. सर्व पदं बडगुजर यांनाच दिली जातात, इतर कार्यकर्त्यांना डावललं जातं. आम्ही अनेकदा नाराज होतो, पण कधीच बोललो नाही. मात्र, बडगुजर यांनी त्याबद्दल भाष्य केले नाही असा आरोप विलास शिंदे यांनी केला आहे. संजय राऊत यांच्या इतके जवळचे असताना बडगुजर नेमके का नाराज आहेत असा सवालही शिंदेंनी उपस्थित केला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.