Nashik Central Jail : नाशिकच्या कारागृहात आणखी एक हादरवणारी घटना ! कैद्याने घेतला टोकाचा निर्णय..

Nashik News : नाशिकच्या मध्यवर्ती कारागृहात खळबळजनक घटना घडली आहे. कारागृहात शिक्षा भोगत असलेल्या एका कैद्याने कारागृहातच गळफास घेऊन जीवन संपवलं आहे. रविवारी (दि. 26 ऑक्टोबर) दुपारच्या सुमारास ही घटना उघडकीस आली. शिवदास भालेराव (वय ५८) असे गळफास घेतलेल्या बंदीवानाचे नाव आहे.

शिवदास भालेराव हे सिन्नर तालुक्यातील रहिवासी आहेत. एका अल्पवयीन मुलीवर बलात्कार केल्याप्रकरणी पोलिसांनी त्यांना अटक केली होती. न्यायालयाने त्यांना न्यायालयीन कोठडी सुनावली होती. या गुन्ह्यात ते न्यायबंदी म्हणून जून २०२४ सालापासून नाशिकरोड येथील मध्यवर्ती कारागृहात शिक्षा भोगत होते. त्यांनी कारागृहातील एका कोपऱ्यात दुपारच्या सुमारास कशाच्या तरी साहाय्याने फाशी घेतली.

रविवारी दुपारच्या सुमारास भालेराव याने गळफास घेतल्याचे कारागृहातील पोलिस अंमलदारांच्या लक्षात आले. कारागृहातील दोघा पोलिस अंमलदारांनी तातडीने संबंधितास खाली उतरवून शासकीय जिल्हा रुग्णालयात दाखल केले. यावेळी वैद्यकीय अधिकारी यांनी तपासून त्यांना मयत घोषित केले.

याप्रकरणी नाशिकरोड पोलिस ठाण्यात अकस्मात मृत्यूची नोंद करण्यात आली आहे. कैद्याने गळफास का घेतला याचे निश्चित कारण अद्याप समजलेले नाही. दरम्यान या घटनेने खळबळ उडाली असून पुन्हा एकदा नाशिककारागृह चर्चेत आले आहे. ही घटना म्हणजे कारागृहातील सुरक्षा व्यवस्थेतील गंभीर त्रुटी दाखवणारी आहे. तसेच सहकारी कैद्यांमध्येही भीतीचे वातावरण आहे.

दरम्यान या आत्महत्येच्या काही दिवस आधी नाशिकरोड मध्यवर्ती कारागृहातील कैदी गांजा पार्टी करत असल्याचा व्हिडीओ व्हायरल झाल होता. धक्कादायक म्हणजे कैद्यांनी मातीच्या चिलीमधून गांजा ओढतानाच्या रील बनवल्या. या रील्स व्हायरल झाल्याने कारागृहातील सुरक्षिततेवर प्रश्नचिन्ह उपस्थित झाले. हे व्हिडीओ जुने मागील वर्षीचे असल्याचे कारागृह प्रशासनाने सांगितले. यातील पाच ते सहा कैद्यांवर गुन्हाही दाखल करण्यात आला होता.

परंतु कारागृहात असे प्रकार घडतात तरी कसे? अंमली पदार्थ येतात कुठून हा मोठा प्रश्न आहे. त्यामुळे नक्की नाशिकच्या कारागृहात चाललंय तरी काय असा प्रश्न नाशिककरांना पडला आहे. त्यात आता या आत्महत्येच्या घटनेने तर तुरुंग व्यवस्थेच्या कार्यक्षमतेवरच प्रश्नचिन्ह उपस्थित झालं आहे.