Nashik News : कोराना काळातील आपत्तींचा फायदा घेत अनेक रुग्णालयांनी पैसे लाटल्याचे प्रकार उघडकीस आले आहेत. याच काळात नाशिकच्या civil hospital अर्थात जिल्हा रुग्णालयात मोठा घोटाळा झाल्याचे समोर आले आहे. साम वृत्तवाहिनीने यांसदर्भात वृत्त दिले आहे. साम टीव्हीच्या वृत्तानुसार नाशिक जिल्हा रुग्णालय आणि मालेगाव सामन्य रुग्णालयातील मॉड्युलर आयसीयू उभारणीचे काम एका बनावट परवानाधारक कंपनीला देऊन सरकारची 11 कोटी रुपयात फसवणूक केल्याचे उघड झाले आहे.
नाशिकच्या जिल्हा रुग्णालयातील कोवीड काळातील हा मोठा घोटाळा समोर आल्याने आरोग्य विभागात खळबळ उडाली आहे. दरम्यान या प्रकरणी कोराना काळातील तत्कालीन नाशिक जिल्हा शल्यचिकित्सक, मुख्य प्रशासकीय अधिकाऱ्यासह संबंधित अन्य अधिकारी, कर्मचाऱ्यांवर फौजदारी गुन्हा दाखल करण्याचे निर्देश नाशिक जिल्हा परिषदेच्या मावळत्या मुख्य कार्यकारी अधिकाऱ्यांनी जिल्हा शल्यचिकित्सकांना दिले आहेत.
मिळालेल्या माहितीनुसार, कोराना काळात (2021 - 22) मध्ये हा घोटाळा झाला. त्यावेळी ईसीआरपी-2 योजनेंतर्गत नाशिक जिल्हा रुग्णालयात 30 खाटांचे आणि मालेगाव सामान्य रुग्णालयात 10 खाटांचे मॉड्युलर आयसीयू उभारण्याचा निर्णय घेण्यात आला होता. ठाणे येथील क्रेनोव्हेटिव्ह पॉवरटेक प्रा. लि. या कंपनीला काम देण्यात आले होते. मात्र, ही कंपनी बनावट परवाना वापरत असल्याचे चौकशीत स्पष्ट झाले आहे.
धक्कादायक म्हणजे नाशिक जिल्हा रुग्णालयातील एका कर्मचाऱ्याची पत्नी आणि वडील या बनावट कंपनीचे समभागधारक असल्याचेही चौकशीत उघड झाले आहे. तर संबंधित कंपनीने राज्यात अनेक शासकीय रुग्णालयांचे टेंडर मिळविल्याने या घोटाळ्याची व्याप्ती ५० कोटींवर पोहोचण्याची शक्यता वर्तवण्यात येत आहे.
फक्त मॉड्युलर आयसीयू प्रकल्पासाठी मंजूर 6.74 कोटींपैकी निम्मी म्हणजेच 3.37 कोटी रुपये रक्कम या संशयित बनावट कंपनीला अदा करण्यात आली. त्याशिवाय, इतर 10 निविदा प्रक्रियांच्या माध्यमातून व्हेंटिलेटर, होल्टर मॉनिटर आणि वैद्यकीय उपकरणांच्या खरेदीसाठीही एकूण 7.65 कोटी रुपयांची देयके रुग्णालयाने या कंपनीला अदा केली. परिणामी, सुमारे 11.02 कोटी रुपयांचा शासकीय निधी परवानाधारक नसलेल्या या संशयित कंपनीच्या खात्यावर वर्ग झाल्याची माहिती पुढे आली आहे. संबंधित कंपनीला काळ्या यादीत टाकण्यासह सर्व संबंधितांवर कायदेशीर कारवाईची शिफारस अहवालात करण्यात आली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.