Nashik Bribery Case : नाशिकमध्ये पहिल्यांदाच असं घडलं... PhonePe'वर लाच स्वीकारल्याचा धक्कादायक प्रकार; बदली झालेल्या PSIवर ACBचा गुन्हा

Nashik police officer accepts bribe through UPI: गुन्ह्यात आरोपी न करण्यासाठी व अटक टाळून मदत करण्याच्या मोबदल्यात 4 लाख रुपयांच्या लाचेची मागणी केल्याप्रकरणी लाचलुचपत प्रतिबंधक विभागाने तत्कालीन पोलिस उपनिरीक्षक हर्षवर्धन बहीर यांच्यासह अन्य दोघांविरुद्ध तालुका पोलिस ठाण्यात भ्रष्टाचार प्रतिबंधक कायद्यान्वये गुन्हा दाखल केला असून तिघांनाही अटक करण्यात आली आहे. विशेष म्हणजे हर्षवर्धन बहीर यांची बदली झाल्यानंतर ACB ने ही कारवाई केली आहे.

या प्रकरणातील संशयित हर्षवर्धन बहीर यांची येवला तालुका पोलिस ठाण्यातून अहिल्यानगर जिल्ह्यातील श्रीरामपूर पोलिस ठाण्यात बदली झाल्यानंतरही तक्रारदाराच्या तक्रारीची दखल घेऊन लाचलुचपत प्रतिबंधक विभागाने (एसीबी) चौकशी केली. पाटोदा येथील एका गुन्ह्यात मदत करण्यासाठी बहीर यांनी मध्यस्थामार्फत लाचेची मागणी केल्याचे पडताळणीत निष्पन्न झाल्याचे तक्रारीत नमूद करण्यात आले आहे.

मिळालेल्या माहितीनुसार, तक्रारदाराच्या भावाला एका गुन्ह्यात आरोपी न करण्यासाठी व अटक टाळण्यासाठी सुरुवातीला चार लाख रुपयांची मागणी करण्यात आल्याचा आरोप आहे. तक्रारीनंतर एसीबीने पडताळणी केली असता आरोपींनी लाचेच्या रकमेत तडजोड करून दोन लाख ५० हजार रुपये स्वीकारण्याची तयारी दर्शविल्याचे उघड झाले.

तसेच या व्यवहाराचा भाग म्हणून ९ एप्रिल २०२६ रोजी बहीर यांच्यासाठी ५० हजार रुपये एका मध्यस्थाने फोन-पेच्या माध्यमातून स्वीकारल्याचे तपासात समोर आले. उपनिरीक्षक दर्जाच्या अधिकाऱ्याने खासगी इसमाच्या मध्यस्थीने प्रथमच फोन पे वर लाच स्विकारल्याचा हा जिल्ह्यातील पहिलाच गुन्हा ठरला आहे.

नाशिक लाचलुचपत प्रतिबंधक विभागाने तालुका पोलिस ठाण्यात भ्रष्टाचार प्रतिबंधक अधिनियम, १९८८ तसेच भारतीय न्याय संहितेतील संबंधित कलमान्वये गुन्हा दाखल केला. या प्रकरणाचा पुढील तपास लाचलुचपत प्रतिबंधक विभागाचे अधिकारी करीत आहेत. या कारवाईमुळे पोलिस दलात खळबळ उडाली आहे.