Nashik MLC : गोकुळ गीतेंचा बॉल आता थेट मुख्यमंत्र्यांच्या कोर्टात; फडणवीसांना शिवसेनेचे साकडे?

Nashik News, 10 Jun : नाशिक विधानपरिषदेची निवडणूक प्रचारापेक्षा वेगळ्याच कारणांनी चर्चेत आहे. शिवसेना (एकनाथ शिंदे) पक्षाचे उमेदवार नरेंद्र दराडे अद्यापही प्रचाराऐवजी भाजप नेत्यांच्या संपर्कासाठी अधिक वेळ देत आहेत.

शिवसेनेचे मंत्री उदय सामंत यांच्यावर बंडखोरांच्या माघारीची जबाबदारी टाकण्यात आली होती. त्यात ते यशस्वी होऊ शकले नाही. त्यामुळे मैदानात उतरलेल्या गोकुळ गीते यांच्याबाबत काय करावे हा प्रश्न कायम आहे.

भाजप नेते गिरीश महाजन, शिवसेनेचे मंत्री उदय सामंत आणि शिक्षण मंत्री दादा भुसे यांनी गोकुळ गीते यांच्या मनधरणीचे प्रयत्न केले. त्यात त्यांना यश आले नाही. त्यामुळे याबाबत मंगळवारी निर्णय होईल अशी घोषणा करण्यात आली होती.

प्रत्यक्षात मात्र मंगळवारी कोणतीही घोषणा होऊ शकली नाही. या उलट बंडखोर गोकुळ गीते यांच्या निवासस्थानी जाऊन आमदार किशोर दराडे यांनी पडद्याआड 'ऑफर' दिल्याचे चर्चेत आहे. या ऑफरमुळे निवडणूक वेगळ्याच स्तरावर घेण्याचे उमेदवाराच्या निकटवर्ती यांनी सांगितले.

गोकुळ गीते यांनी माघार घ्यावे यासाठी मुख्यमंत्री प्रयत्न करीत असल्याच्या चर्चा होत्या. काल सायंकाळी गीते यांना मुंबईला मुख्यमंत्र्यांनी पाचारण केल्याची बातमी पसरली होती. प्रत्यक्षात मात्र तसे काहीही घडले नाही. नाशिक विधानपरिषदेच्या निवडणुकीत महायुतीचा उमेदवार निवडून येणार हे नक्की आहे.

मात्र त्यात शिवसेना एकनाथ शिंदे पक्षाची कोंडी करण्यात भाजप यशस्वी झाला हे नक्की. निवडणूक निकालापूर्वीच महायुतीचे अधिकृत उमेदवार दराडे यांना बंडखोरांनी त्रस्त केलं आहे. गोकुळ गीते यांनी गांभीर्याने निवडणुकीला सुरुवात केली आहे.

आता शेवटचा आठवडा निर्णायक ठरणार आहे. यामध्ये शिवसेना एकनाथ शिंदे यांना अडचणीत आणण्याची संधी विरोधक घेण्याची शक्यता आहे. या चिंतेने उमेदवार दराडे कोणतीही रिस्क घेण्यास तयार नाहीत. या पार्श्वभूमीवर आता माघारीच्या चर्चा मागे पडतात की आज नव्या चर्चांना उधान येते याची उत्सुकता आहे.