Nashik NMC : नाशिकच्या स्थायी सभापतींनी निधीसाठी ठोठावलं शिंदे-फडणवीसांचं दार, कशासाठी हवेत 500 कोटी?

Nashik Politics : नाशिक महापालिकेत भाजपने १२२ पैकी ७२ जागा जिंकत स्वबळावर सत्ता मिळवली. मात्र तरीही शेवटच्या क्षणी भाजपने शिवसेना (शिंदे) गटाला सत्तेत सहभागी करुन घेतलं. शिवाय उपमहापौरपदही शिवसेनेला दिलं. त्यामुळे प्रत्यक्ष निवडणुकीत परस्परविरोधी लढणारे दोन्ही पक्ष सत्तास्थापन करताना एकत्र आले. त्यामुळे नाशिकमध्ये आता शिवसेना व भाजप एकत्रित सत्तेत आहेत. भाजपचे ७२ व शिवसेनेचे २६ नगरसेवक आहेत.

या नगरसेवकांना प्रशासकीय राजवटीत गेल्या चार वर्षांतील मोठ्या प्रमाणावरील विकासाचा बॅकलॉग भरून काढणे आवश्यक झाले आहे. या चार वर्षांत प्रलंबित समस्यांचे निराकरण आणि प्रभागनिहाय विकास कामे करण्यासाठी ५०० कोटी रुपयांच्या निधीची मागणी स्थायी समिती सभापती मच्छिंद्र सानप यांनी मुख्यमंत्री देवेंद्र फडणवीस, उपमुख्यमंत्री तथा नगरविकास खात्याचे मंत्री एकनाथ शिंदे यांच्याकडे केली आहे.

नुकतेच नाशिक महापालिकेचे २०२६ -२७ आर्थिक वर्षासाठी ३ हजार कोटी रुपयांचे अंदाजपत्रक सादर करण्यात आले. मात्र, या अंदाजपत्रकात ३१ प्रभागातील १२२ नगरसेवकांना त्यांच्या प्रभागात विकासकामे करण्यासाठी केवळ एकुण ५० कोटी रुपये देणार आहेत. मात्र नगरसेवकांनी आपल्या प्रत्येक प्रभागात २० कोटी रुपयांची कामे सूचवली आहेत. म्हणजे जवळपास पाचशे ते सहाशे कोटींचे कामे सूचवली आहेत. परंतु प्रत्यक्षात त्यांना केवळ ५० कोटी रुपये मिळाले आहेत.

सन २०२७ मध्ये कुंभमेळा होत असून या निमित्ताने शहरात साधरण १० हजार कोटी रुपयांची कामे सुरु आहे. मात्र नगरसेवकांना हवी असलेली कामे या निधीतून होत नाहीत. नगरसेवकांना त्यांच्या प्रभागात विकास कामे करण्यासाठी स्वतंत्र निधीची आवश्यकता आहे. त्यासाठी अंदाजपत्रकातील ५० कोटी रुपयांचा निधी पुरेसा नाही. त्यासाठी नगरसेवकांना त्यांच्या प्रभागांमध्ये विकासकामे करण्यासाठी विशेष निधीची आवश्यता आहे.

चार वर्षांनी लोकनियुक्त नगरसेवकांची सत्ता आल्याने जनतेच्या नवनिर्वाचित नगरसेवकांकडून नागरिकांच्या अपेक्षा वाढल्या आहेत. प्रभागातील रस्ते दुरुस्ती व नवीन रस्ते बांधकाम पाणीपुरवठा व्यवस्था सुधारणा व नवीन जलवाहीनी टाकणे, कचरा व्यवस्थापन, ड्रेनेज व पावसाळी सांडपाणी व्यवस्था सक्षमीकरण, दवाखाने व आरोग्य सुविधा वाढविणे, सार्वजनिक उद्याने, स्वच्छतागृहे व नागरी सुविधा विकसित करण्यासाठी स्थायी समिती सभापती मच्छिंद्र सानप यांनी ५०० कोटी रुपयांचा निधी मिळावा या मागणीसाठी मुख्यमंत्री फडणवीस यांच्यासह उपमुख्यमंत्री एकनाथ शिंदे यांचा दरवाजा ठोठावला आहे.