Nashik municipal election : महापालिकेतील एबी फॉर्मच्या गोंधळाबाबत गिरीश महाजनांचे कानावर हात; म्हणाले, 'मुख्यमंत्र्यांशी बोलू...'

Nashik News, 04 Jan : महापालिका निवडणुकीतील एबी फॉर्मचा गोंधळ भाजपचा पिछा सोडायला तयार नाही. या वादात काही माझे नगरसेवकांना उमेदवारीवर पाणी सोडावे लागले आहे. त्यामुळे हा वाद आता थेट मुख्यमंत्र्यांपर्यंत पोहोचला आहे.

नाशिक महापालिका निवडणूक 5 ते 7 एबी फॉर्म चुकीच्या पद्धतीने देण्यात आले. या विषयावर आता मंत्री गिरीश महाजन यांनी देखील कानावर खात ठेवले आहेत. या संदर्भात नेमकी काय घडले याची माहिती घ्यावी लागेल असे ते म्हणाले.

ठाकरेंच्या शिवसेनेतून भारतीय जनता पक्षात प्रवेश केलेले सुधाकर पाटील हे वादाचे केंद्र आहेत. एबी फॉर्म विषयी त्यांच्यावर प्रतिस्पर्धी भाजपच्या उमेदवाराने आरोप केला आहे. या भागात दोन उमेदवारांना भाजपला पुरस्कृत करावे लागले आहे.

या संदर्भात बडगुजर यांचे विरोधक आणि भाजपचे माजी नगरसेवक मुकेश शहाणे यांनी नुकतीच गिरीश महाजन यांची भेट घेतली. प्रभाग क्रमांक 29 मध्ये बडगुजर यांच्या अप्रत्यक्ष खेळीने एबी फॉर्मचा घोटाळा झाला. याबाबत संबंधितांवर कारवाई झाली पाहिजे अशी मागणी शहाणे यांनी केली. आता महाजन यांनी या विषयावर नेमके मतप्रदर्शन करण्याचे टाळले. एबी फॉर्म चे वाटप करताना काही इच्छुकानी गोंधळ घातला.

त्यामुळे पाच ते सात एबी फॉर्म गहाळ झाले. ते कोणाच्या हाती लागले हे तपासावे लागेल. याबाबत नेमकी माहिती आपल्याकडे नाही, असे सांगत मंत्री महाजन यांनी कानावर हात ठेवले. नाशिक महापालिका भाजप उमेदवारीच्या वादात मोठ्या प्रमाणात आरोप प्रत्यारोप झाले. या संदर्भात आमदार सीमा हिरे यांनी थेट प्रदेशाध्यक्ष यांच्याकडे तक्रार केली. काही नगरसेवकांनी थेट मुख्यमंत्री देवेंद्र फडणवीस यांच्याकडे गाऱ्हाणे मांडले.

याबाबत आता गिरीश महाजन यांनी संबंधित उमेदवारांची चर्चा करणार असल्याचे सांगितले. नेमके काय घडले याची माहिती ते घेणार आहे. यातील कोणते उमेदवार मुख्यमंत्र्यांकडे काय बोलले याविषयी आपल्याला माहिती नाही. त्यामुळे त्याबाबत मुख्यमंत्र्‍यांशीच बोलावं लागेल, असे सूचक विधानही महाजन यांनी केले. महापालिका निवडणुकीची प्रक्रिया सुरू झाली आहे. प्रचाराला जोर आला आहे. या स्थितीत भाजपच्या अंतर्गत गोठात मात्र एबी फॉर्मचा गोंधळ चर्चेचा विषय आहे. हा गोंधळ भाजपचा पिछा सोडायला तयार नाही.