Nashik Politics : नाशिकमध्ये महापालिकेच्या निवडणुकीसाठी भाजपच्या एबी फॉर्म वाटपात मोठा गोंधळ उडाला होता. या गोंधळाची चौकशी थेट मुख्यमंत्री आणि भाजप प्रदेशाध्यक्ष करणार असून दोषी आढळणाऱ्यांवर कारवाई करणार असल्याची माहिती जलसंपदा मंत्री व निवडणूक प्रभारी गिरीश महाजन यांनी नाशिकमध्ये माध्यमांशी बोलताना दिली.
अनेक ठिकाणी एकाच प्रभागात दोन-दोन अर्ज देण्यात आल्याने उमेदवार पुरस्कृत करण्याची वेळ पक्षावर आली. या प्रकरणाची चौकशी करण्यासाठी प्रदेशाध्यक्ष रवींद्र चव्हाण रविवारी (ता. ४) नाशिकमध्ये येणार आहेत. महापालिका निवडणुकीच्या प्रचाराचा नारळ फोडण्यासाठी ते नाशिकमध्ये येणार असल्याचे सांगण्यात येत असले तरी ते एबी फॉर्म घोटाळ्याची चौकशी देखील करणार असल्याचे वृत आहे.
सिडकोत भाजपच्या एका नेत्याकडे तब्बल चार एबी फॉर्म दिले गेले होते. त्यामुळे एका प्रभागात दोन उमेदवारांना पुरस्कृत करण्याची वेळ पक्षावर आली. तर पक्षाच्या एका उमेदवाराने अपक्ष उमेदवारी कायम ठेवली आहे. यांसदर्भात भाजप आमदार सीमा हिरे यांनी या प्रकरणाची चौकशी व्हावी अशी मागणी मुख्यमंत्री देवेंद्र फडणवीस व प्रदेशाध्यक्ष रवींद्र चव्हाण यांच्याकडे भेट घेत केली होती.
तसेच नाशिकमध्ये एबी फॉर्म वाटपावेळी मोठा गोंधळ उडाला होता. एबी फॉर्म घेऊन जाणाऱ्या शहराध्यक्षांच्या गाडीचा पाठलाग झाला होता. पैसे घेऊन तिकीट वाटप करण्यात आल्याचा आरोप निष्ठावान कार्यकर्त्यांनी केला. या गोंधळामुळे राज्यभर पक्षाची नाच्चकी झाली. दरम्यान तिकीट वाटपात झालेल्या गैरव्यवहाराचे आरोप मात्र निराधार असल्याचा दावा महाजन यांनी केला आहे.
प्रभाग क्रमांक २५ आणि २९ मध्ये 'एबी' फॉर्मच्या वाटपावरून झालेल्या गोंधळात सुधाकर बडगुजर यांच्याकडे तब्बल चार 'एबी' फॉर्म कसे आले? कोणाला कुठून माघार घेण्याच्या सूचना देण्यात आल्या, कोण कुठल्या प्रभागातून निवडणूक लढवणार होते. याबाबत मुख्यमंत्री आणि प्रदेशाध्यक्षांच्या निर्देशानुसार सखोल चौकशी करण्यात येणार आहे. अशी माहिती महाजन यांनी दिली.
दरम्यान या प्रकरणात ज्यांना मोठा फटका बसला व अपक्ष उमेदवारी करण्याची नामुष्की ओढावली त्या भाजपचे माजी नगसेवक मुकेश शहाणे यांनी मंत्री गिरीश महाजन यांची भेट घेत एबी फॉर्म घोटाळ्याबाबत संबंधितांवर कारवाई झाली पाहिजे अशी मागणी शहाणे यांनी केली होती.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.