Nashik Election : सुधाकर बडगुजरांच्या मुलाचा पहिल्याच निवडणुकीत पराभव, बहुचर्चित अपक्ष उमेदवार मुकेश शहाणेंचा विजय

Nashik Politics : नाशिकच्या प्रभाग क्रंमाक २९ अ मध्ये सुधाकर बडगुजर यांचे चिरंजीव भाजपचे उमेदवार दीपक बडगुजर यांचा पराभव झाला आहे. एबी फॉर्म उडाल्याने अपक्ष लढलेल्या मुकेश शहाणे यांचा विजय झाला असून त्यांनी दीपक बडगुजर यांचा पराभव केला आहे.

प्रभाग क्रमांक २५ मध्ये भाजपचे सुधाकर बडगुजर हे स्वत: निवडून आले असले तरी प्रभाग २९ मध्ये त्यांच्या मुलाचा धक्कादायक पराभव झाला आहे. तसेच प्रभाग २५ चा निकालही बडगुजर यांच्यासाठी धक्कादायक लागला आहे. कारण. ४ पैकी २ जागेवर भाजप तर एका जागेवर शिंदेंची शिवसेना आणि एका जागेवर ठाकरेंच्या शिवसेनेचा उमेदवार विजयी झाला आहे. प्रभाग क्रमांक २५ मध्ये भाजपचे सुधाकर बडगुजर आणि भाजपच्या साधना मटाले विजयी झाल्या.

तर इतर २ जागांवर शिंदेंच्या सेनेच्या कविता नाईक विजयी आणि ठाकरेंच्या शिवसेनेचे मुरलीधर भांबरे विजयी झाले आहेत. भाजपने पुरस्कृत केलेले भाग्यश्री ढोमसे आणि प्रकाश अमृतकर पराभूत झाले आहे.

तर, भारतीय जनता पक्षाच्या एबी फॉर्म वाटपात निर्माण झालेल्या गोंधळावरून सर्वाधिक चर्चेत आलेल्या प्रभाग क्रमांक - २९-अ मधील भाजप अधिकृत उमेदवार दीपक बडगुजर आणि पूर्वाश्रमीचे भाजपचे व आताच्या निवडणुकीत अपक्ष निवडणूक लढविणारे मुकेश शहाणे या दोघांमधील लढतीकडे संपूर्ण शहराचे लक्ष लागले होते. बंडखोरी केल्याने शहाणे यांची भाजपने हकालपट्टी केली होती. परंतु अपक्ष लढूनही मुकेश शहाणे यांनी बाजी मारली असून दीपक बडगुजर यांना आस्मान दाखवले आहे.

दीपक बडगुजर यांनी पहिल्यांदाच निवडणूक लढवली मात्र पहिल्याच निवडणुकीत त्यांचा पराभव झाला आहे. शहाणे यांनी सन २०१२ ची निवडणूक लढविली होती; मात्र त्यावेळी कमी मतांनी त्यांचा पराभव झाला. मात्र सन २०१७ मध्ये भाजपकडून निवडणूक लढविताना त्यांनी विजय मिळविला. बडगुजर व शहाणे या दोन तरुणांच्या लढतीत प्रभाग २९ चे मतदारांनी अखेर मुकेश शहाणे यांना कौल दिला आहे.