BJP Politics: भाजप नेत्याने थेट पिस्तूलचं काढलं, हिंदुत्ववादी नेत्यालाच धमकावलं!

Nashik News: नाशिक शहरात वाहनाला कट मारणाऱ्या भाजप आणि हिंदुत्ववादी नेत्यामध्ये दिवसभर पोलीस ठाण्यात वाद झाला. मंगळवारचा दिवस अंबड पोलीस ठाण्यात सत्ताधारी भाजप आणि त्यांच्या सहकारी पक्षाच्या नेत्यांतील वाद सोडवण्यातच गेला.

यामध्ये पोलिसांनी तक्रार घेण्यास दिवसभर टाळाटाळ केली. शेवटी भाजपच्या माजी नगरसेविकेचे पती यशवंत निकुळे यांच्याविरुद्ध अदखलपात्र गुन्हा दाखल केला. यामध्ये पडद्यामागून कोण सूत्रे हलवीत होते याची जोरदार चर्चा आहे.

भाजपचे यशवंत निकुळे मंगळवारी रस्त्याने उलट्या दिशेने गाडी चालवत येत होते. पाथर्डी फाटा येथे त्यांनी प्रा. धीरेंद्र सिंग यांच्या गाडीला कट मारला. त्यामुळे सिंग यांच्या गाडीचा मोठा अपघात होता होता राहिला. याबाबत सिंग यांनी निकोळे यांना जाब विचारला.यावेळी निकुळे यांनी तुला जिवंतच ठेवत नाही' असे धमकावत गाडीतून थेट पिस्तूल काढून आपल्यावर रोखले, अशी माहिती प्राध्यापक सिंग यांनी दिली.

या वादावादीत गर्दी जमा झाली. गर्दीतील नागरिकांनी निकुळे यांची चूक लक्षात आल्यावर त्यांना समज देण्याचा प्रयत्न केला. तेव्हा निकुळे परिस्थितीचे गांभीर्य पाहून तेथून सटकले. सिंग यांचे बंधू बजरंग दलाचे पदाधिकारी आहेत. त्यामुळे मी निकुळे यांनी माझे कोणी काही करू शकत नाही. तुझा काय कार्यक्रम लावतो ते बघ, असे सांगत पिस्तुलाने धमकावले.

ही तक्रार घेण्यास पोलिसांनी टाळाटाळ केली. संध्याकाळपर्यंत फिर्यादी हट्टाने पेटल्याने त्यांनी पोलिसांना फिर्याद दाखल करण्यास वारंवार विनंती केली. अखेर त्यांचा तक्रार अर्ज घेऊन त्यात पिस्तूल हा शब्द मात्र टाकला नाही, असा आरोप पोलिसांवर करण्यात आला आहे.

शहरात गेल्या काही आठवड्यात वादग्रस्त आणि गुन्हे दाखल असलेल्या व्यक्तींना भाजपने आपली दारे सताड मोकळी केली आहेत. महापालिका निवडणुकीच्या पार्श्वभूमीवर सत्ता महत्त्वाची असल्याचे नेत्यांनी जाहीरपणे सांगली. आता सत्ताधारी पक्षातच हे वाद उफाळून येऊ लागले आहेत. त्यामुळे नाशिक शहरात तो चर्चेचा विषय ठरला आहे.