Krushna Andhale : कृष्णा आंधळेबाबत नाशिक पोलिसांनी दिली मोठी माहिती; ‘सीसीटीव्ही फुटेजमधील ती व्यक्ती...’ (Video)

Nashik, 13 March : मस्साजोगचे सरपंच संतोष देशमुख खून प्रकरणातील आरोपी कृष्णा आंधळे अद्यापही पोलिसांना सापडलेला नाही. आंधळे हा नाशिकमध्ये फिरत असल्याचा दावा स्थानिक नागरिकांनी बुधवारी (ता. 12 मार्च) केला होता. मात्र, नाशिक पोलिसांनी बुधवारी दिवसभर केलेल्या तपासातून नवीन माहिती पुढे आली आहे. सीसीटीव्ही फूटेजमध्ये दिसणारी ती व्यक्ती कृष्णा आंधळे नसून दुसरीच कोणीतरी आहे, असा दावा नाशिक पोलिसांनी केला आहे. मात्र, आंधळेबाबत आणखी तपाणी सुरू आहे, असेही पोलिसांनी नमूद केले आहे.

नाशिक शहरातील गंगापूर रोड परिसरातील सहदेव नगरमधील दत्त मंदिर परिसरात कृष्णा आंधळे (Krushna Andhale) दिसल्याची माहिती स्थानिकांनी पोलिसांना दिली होती. पोलिसांनी परिसरात कृष्णा आंधळे याचा शोध घेतला. परिसरातील उपलब्ध सीसीटीव्हीची तपासणी केली. मात्र, त्या दिवसभराच्या तपासणीत कृष्णा आंधळे हा नाशिक परिसरात असल्याचा एकही पुरावा पोलिसांना सापडला नाही.

संतोष देशमुख (Santosh Deshmukh) यांच्या खुनाच्या घटनेला तीन महिने होऊन गेले आहेत. या प्रकरणातील एक आरोपी अजूनही फरार आहे. मात्र, तो फरार आरोपी कृष्णा आंधळे हा गंगापूर रोड परिसरात आढळल्याची माहिती एका स्थानिक नागरिकाने दिली होती. सहदेव नगरमधील दत्त मंदिरात मास्क घालून उभे असलेले दोघे मला दिसले होते. त्यातील एकाने मास्क खाली घेतल्यानंतर तो कृष्णा आंधळे असल्याचे मी ओळखले. त्याबाबत मी तातडीने पोलिसांनी सांगितले. पोलिस येईपर्यंत ते मखमालच्या दिशेने पळून गेले, असा दावा स्थानिकांनी केला आहे.

दरम्यान, या घटनेची माहिती मिळताच नाशिक पोलिसांनी तातडीने शोध मोहिम हाती घेतली. परिसरातील सर्वच ठिकाणी त्यांनी तपासणी केली होती, मात्र कृष्णा आंधळे त्यांना कुठेही दिसला नाही. नाशिक पोलिसांनी बुधवारी दिवसभर कृष्णा आंधळेचा शोध घेतला.

पोलिसांनी सीसीटीव्ही तपासण्याचा निर्णय घेतला. परिसरातील सर्व सीसीटीव्हीची पोलिसांकडून तपासणी करण्यात आली, त्यातून कृष्णा आंधळे याची ओळख पटविण्याचा प्रयत्न पाेलिसांनी केला आहे. मात्र, सीसीटीव्हीत दिसलेला व्यक्ती कृष्णा आंधळे हाच होता, याचा कोणताही पुरावा पोलिसांच्या हाती आलेला नाही. मात्र, त्याबाबतचा तपास आणखी गतीने करण्यात येत आहे, असेही पोलिसांनी सांगितले.