Nashik Politics : नाशिकमध्ये काँग्रेसच्या आंदोलनाला सत्ताधारी नगरसेविकेचा पाठिंबा; भाजपला एकटं पाडलं

Nashik News, 04 Aug : नाशिक शहरातील खड्डे हा केवळ आंदोलनाचा विषय राहिलेला नाही. भाजपने जमवलेल्या अन्य पक्षांच्या नेत्यांची घालमेल आणि अस्वस्थतेचे प्रतीक बनला आहे. सत्ताधारी भाजप यामध्ये एकटा पडल्याचे चित्र आहे.

राज्य विधिमंडळ असो वा महापालिका भाजपने जो जो विरोधक असेल त्याला साम दाम दंड भेद नीतीने भाजपकडे वळवले. त्यातून राजकीय कोंडी आणि अस्वस्थता कशी निर्माण होते हे शहरात पाहायला मिळत आहे. शहरातील खड्डे त्याला निमित्त ठरले आहेत.

सोमवारी काँग्रेस शहराध्यक्ष निलेश खैरे यांच्या नेतृत्वाखाली खड्ड्यांच्या विरोधात आंदोलन झाले. महापालिकेच्या प्रवेशद्वारावर काँग्रेस कार्यकर्त्यांनी जोरदार घोषणा देत प्रशासनाचे पितळ उघडे पाडले. तातडीने कारवाई न झाल्यास तीव्र आंदोलनाचा इशारा दिला.

महापालिकेच्या प्रवेशद्वारावर आंदोलन झाले. यावेळी सत्ताधारी राष्ट्रवादी काँग्रेसच्या नगरसेविका डॉ. हेमलता पाटील तिथे आल्या. निवडणुकीपूर्वी त्यांनी काँग्रेसला सोडचिठ्ठी दिली होती. त्यामुळे काँग्रेसच्या कार्यकर्त्यांना आश्चर्य वाटले.

सत्ताधारी डॉ. पाटील यांनी यापूर्वीच शहरातील खड्डे आणि प्रदूषणाच्या विषयावर प्रशासनाला धारेवर धरले होते. काँग्रेसचे आंदोलन सुरू असताना त्या थेट व्यासपीठावर गेल्या. खड्डे आणि नादुरुस्त रस्ते यामुळे नागरिकांच्या व्यथा त्यांनी मांडल्या. सत्ताधारी नगरसेविकाच विरोधकांच्या आंदोलनाला पाठिंबा देत असल्याचे चित्र दिसले.

नाशिक महापालिकेत भाजपसोबत शिवसेना आणि राष्ट्रवादी काँग्रेसही सत्तेत आहे. भाजपचा महापौर तर शिवसेनेचा उपमहापौर आहे. जनतेतील रोष लक्षात आल्यावर महापौर, उपमहापौर देखील रस्त्यावर उतरले होते.

आता सत्ताधारी पक्षाच्या नगरसेविका डॉ. पाटील या चक्क काँग्रेसच्या आंदोलनात सहभागी झाल्या. त्यामुळे भाजपने विविध मार्गांचा उपयोग करून निवडणुकीआधी जमा केलेले विविध विचारांच्या पक्षांचे लोक सत्तेत असूनही अस्वस्थ असल्याचे चित्र आहे. त्यात गैरकारभाराचा भागीदार एकटा भाजप ठरला आहे.