Nashik Zilla Parishad : स्वतःपासूनच सुरुवात करणार, सीईओ ओमकार पवारांचा पहिलाच उपक्रम हृदयाला भिडणारा

Nashik Zilla Parishad : नाशिक जिल्हा परिषदेच्या माजी मुख्य कार्यकारी अधिकारी ( सीईओ) आशिमा मित्तल यांनी अनेक चांगले उपक्रम नाशिक जिल्हा परिषदेच्या माध्यमातून राबवले होते. त्याचप्रमाणे आता नवनिर्वाचित सीईओ ओमकार पवार यांनीही एका चांगल्या व अभिनव उपक्रमाच्या माध्यमातून आपल्या कामकाजाला सुरुवात केली आहे.

कुपोषण मुक्तीचा संकल्प करत 412 बालकांचे पालकत्व सनदी अधिकाऱ्यांना देण्याची अभिनव संकल्पना सीईओ ओमकार पवार यांनी आणली आहे. प्रत्येक अधिकाऱ्याने व कर्मचाऱ्याने कुपोषण मुक्तीचा संकल्प करावा असे आवाहन त्यांनी केले आहे. या उपक्रमात अधिकाऱ्यांनी दत्तक घेतलेल्या कुपोषित बालकांचे संगोपन त्यांचे आई-वडीलच करणार आहेत, पण त्यासाठीचे मार्गदर्शन हे अधिकारी करणार आहेत.

विशेष म्हणजे या उपक्रमाची सुरुवात ओमकार पवार हे स्वत:पासून करणार आहेत. ते स्वत:लवकरच पहिल्या मुलाची जबाबदारी स्वीकारणार आहेत. या उपक्रमाच्या माध्यमातून निश्चितच जिल्हा कुपोषणमुक्त होण्यास मदत होईल अशी आशा पवारांना आहे. त्यासाठी कुपोषित बालकांची संख्या लपवू नका, आपण सगळे मिळून त्यावर काम करु असे आवाहन त्यांनी केले आहे.

माजी सीईओ आशिमा मित्तल यांनीही कुपोषण निर्मुलनासाठी बेस्ट फीडिंग हा प्रभावी उपक्रम राबवला होता. त्यानंतर आता विद्यमान सीईओ ओमकार पवार यांनी देखील हा विषय हाती घेतला आहे. त्यांनी महिला बालकल्याण विभागाचा सविस्तर आढावा घेत, जिल्हयातील कुपोषणाची समस्या व त्याबाबत असलेल्या विविध योजनांची माहिती जाणून घेतली. कुपोषण मुक्ती करण्यासाठी काय काय आपण करु शकतो यासंदर्भात त्यांनी अधिकाऱ्यांशी चर्चा केली. त्यानंतर कुपोषित बालके सनदी अधिकाऱ्यांना दत्तक देण्याची अभिनव संकल्प राबविण्याचा निर्णय त्यांनी घेतला आहे.

नाशिक जिल्ह्याला कुपोषण मुक्त करण्यासाठी सर्वांचा सहभाग महत्वाचा आहे. या दृष्टीने कुपोषित बालक दत्तक योजना राबवत आहोत. यात सर्व शासकीय कार्यालयातील वरिष्ठ अधिकाऱ्यांना प्रत्येकी एक -एक कुपोषित बालक दत्तक घेण्यासाठी विनंती केली जाणार आहे. अधिकाऱ्यांनी सहकार्य केल्यास निश्चितच कुपोषण कमी होण्यास मदत होईल. याची सुरुवात मी स्व:पासून करणार आहे अशी माहिती जिल्हा परिषदेचे मुख्य कार्यकारी अधिकारी ओमकार पवार यांनी दिली आहे.