Nashik ZP Elections : सुनेत्रा पवारांसमोर भाजपचं मोठं आव्हान; मिनी मंत्रालयात कोण मारणार बाजी?

Nashik News, 30 Oct : सर्वोच्च न्यायालयाच्या निकालानंतर राज्यातील जिल्हा परिषद निवडणुकांचा मार्ग मोकळा झाला आहे. नाशिक जिल्ह्यात मिनी मंत्रालय म्हणून ओळखल्या जाणाऱ्या जिल्हा परिषदेच्या निवडणुकीत तीव्र संघर्ष होण्याची चिन्हे आहेत. राज्यात नुकत्याच पाच विधान परिषद मतदारसंघांत निवडणुका झाल्या. त्यामध्ये पुणे जिल्ह्यात राष्ट्रवादी काँग्रेसच्या अजित पवार पक्षाला अंतर्गत विसंवादाचा मोठा फटका बसला. त्यामुळे पक्षाची पिछेहाट झाल्याचे खासदार प्रफुल्ल पटेल यांनी जाहीरपणे मान्य केले होते.

उपमुख्यमंत्रीपदाची शपथ घेतल्यानंतर सुनेत्रा पवार यांच्यासाठी मिनी मंत्रालय असलेल्या जिल्हा परिषदेची निवडणूक ही महत्त्वाची परीक्षा असेल. बारामती मतदारसंघातील साखर कारखाने आणि अन्य निवडणुकांमध्ये त्यांनी पारंपरिक वर्चस्व कायम ठेवले. आता त्यांना पुणे जिल्ह्याबाहेर पडावे लागणार आहे.

राष्ट्रवादी काँग्रेस पक्षाचे जिल्ह्यातील १५ पैकी सात आमदार आहेत. हे सर्व सात आमदार सातत्याने निधीच्या मागणीसाठी झगडत असतात. मतदारसंघातील विकासकामे नेमकी कोणासाठी आणि कशी होतात, हे लपून राहिलेले नाही. त्यामुळे या आमदारांना आता मिळालेल्या निधीचे जिल्हा परिषद निवडणुकीतील यशात रूपांतर करून दाखवावे लागणार आहे.

जिल्ह्यात सात आमदार आणि ज्येष्ठ मंत्री छगन भुजबळ, तसेच अन्न व नागरी पुरवठामंत्री नरहरी झिरवाळ असे दोन मंत्री आहेत. याशिवाय माणिकराव कोकाटे यांना न्यायालयीन प्रक्रियेमुळे मंत्रिपद सोडावे लागले होते. जिल्ह्यातील बहुतांश जागा या सात आमदारांच्या मतदारसंघांत आहेत.

दुसरीकडे, पालकमंत्रीपदासह महापालिका आणि अन्य संस्थांवर भाजपने सत्तेच्या माध्यमातून आपले वर्चस्व प्रस्थापित केले आहे. गिरीश महाजन पालकमंत्री असल्याने त्यांनी जिल्ह्याच्या राजकारणावरील आपली पकड मजबूत केली आहे. अशा स्थितीत राष्ट्रवादी काँग्रेसला भाजपशी संघर्ष करणे अटळ आहे. या निवडणुकीत राष्ट्रवादी काँग्रेससमोर मित्रपक्ष भाजपचेच मोठे आव्हान असेल.