Kishor Patil : आमदार किशोर पाटील भाजपला पुरुन उरले, पाचोरा-भडगाव दोन्ही ठिकाणी नगराध्यक्ष निवडून आणले

Jalgaon Politics : शिवसेना शिंदे गटाचे पाचोरा भडगाव मतदारसंघाचे आमदार किशोर पाटील यांनी आपला स्वबळाचा नारा यशस्वी करुन दाखवला आहे. भाजपच्या तगड्या आव्हानाला त्यांनी धूळ चारली आहे. त्यांच्या पत्नी सुनीता किशोर पाटील या पाचोरा नगरपालिकेच्या नगराध्यक्षपदासाठी विजयी झाल्या आहेत. तसेच भडगावमध्येही शिवसेना शिंदे गटाच्या रेखा मालचे यांनी बाजी मारली आहे.

किशोर पाटील यांनी भाजपला आव्हान देत राज्यात सर्वात आधी आपल्या मतदारसंघात स्वबळाची घोषणा केली होती. कोणत्याही परिस्थिती भाजपसोबत युती करणार नाही असा पवित्र त्यांनी घेतला होता. भाजपचे स्थानिक तसेच वरिष्ठ सर्वच नेत्यांनी किशोर पाटलांना त्यानंतर घेरलं होतं. मात्र किशोर पाटील भाजपला पुरुन उरले आहेत.

किशोर पाटील यांनी म्हटल्याप्रमाणे पाचोरा व भडगाव दोन्ही नगरपालिकेत शिवसेनेचे नगराध्यक्ष निवडून आणले आहेत. आमदार किशोर पाटील यांनी भाजपच्या तगड्या आव्हानाला धूळ चारत आपले निर्विवाद वर्चस्व सिद्ध केले आहे.

पाचोरा येथे किशोर पाटील यांच्या पत्नी सुनीता पाटील यांनी विजय मिळवला आहे, तर भडगावमध्येही शिवसेनेच्या रेखा मालचे विजयी झाल्या आहेत.

भाजपचे संकटमोचक मानले जाणारे गिरीश महाजन यांच्यासह मंगेश चव्हाण व इतर भाजपच्या सर्वच स्थानिक नेत्यांनी ही निवडणूक प्रतिष्ठेची केली होती. मात्र, या सर्वांना किशोर पाटील यांनी चितपट करत दोन्ही नगरपालिकांवर शिवसेनेचा भगवा फडकवला आहे.

मंत्री गिरीश महाजन यांच्यासह आमदार मंगेश चव्हाण, माजी आमदार दिलीप वाघ, अमोल शिंदे आणि किशोर पाटील यांच्या भगिनी वैशाली सूर्यवंशी या सगळ्यांची फौज एकट्या किशोर पाटलांना पराभूत करण्यासाठी मैदानात उतरली होती. पण किशोर पाटील या सगळ्यांवर भारी पडले.

या विजयानंतर किशोर पाटील यांचे राजकीय वजन वाढले असून पाचोरा आणि भडगावमध्ये शिवसैनिकांनी जल्लोष सुरू केला आहे. किशोर पाटील यांच्या नेतृत्त्वात झालेल्या या विजयाने परिसर दणाणून गेला आहे.