Nashik ZP No Vehicle Day : पीएम मोदींच्या आवाहनाला नाशिक झेडपी'चा प्रतिसाद, दर सोमवारी आता 'नो व्हेइकल डे'

Nashik ZP News : पश्चिम आशियामध्ये निर्माण झालेल्या संकटाच्या पार्श्वभूमीवर पंतप्रधान नरेंद्र मोदी यांनी देशातील नागरिकांना इंधनाचा वापर काटकसरीने करण्याचे आवाहन केले आहे. पेट्रोल आणि डिझेल खरेदीवर खर्च होणारे परकीय चलन वाचवणे ही आपली जबाबदारी असल्याचं मोदींनी म्हटलं आहे. मोदींच्या या आवाहनाला देशभरात वेगवेगळ्या पातळीवर प्रतिसाद मिळताना दिसत आहे. नाशिक जिल्हापरिषदेने देखील मोदींच्या आवाहनाला प्रतिसाद देत महत्वाचा निर्णय घेतला आहे.

राज्य शासनाने जाहीर केलेल्या 19 कलमी उपाययोजनांची जिल्हा परिषद प्रशासनाने अंमलबजावणी सुरू केली आहे. या पार्श्वभूमीवर जिल्हापरिषदेच्या प्रभारी मुख्य कार्यकारी अधिकारी प्रतिभा संगमनेरे यांनी महत्त्वपूर्ण निर्णय घेतला आहे. त्यानुसार जिल्हापरिषदेत आता दर सोमवारी 'नो व्हेइकल डे' पाळला जाणार आहे.

जिल्हा परिषद आणि पंचायत समितीमधील सर्व अधिकारी आणि कर्मचाऱ्यांना दर सोमवारी कार्यालयात येण्यासाठी व परत जाण्यासाठी स्वतःच्या खासगी वाहनांचा वापर बंद करून सार्वजनिक वाहतुकीचा वापर करावा असे निर्देश प्रभारी मुख्यकार्यकारी अधिकारी संगमनेरे यांनी दिले आहेत. (Nashik News)

जिल्हा परिषदेच्या मुख्यालयासह 15 पंचायत समिती अंतर्गत 15 हजारांहून अधिकारी कर्मचारी कार्यरत आहेत. हे सर्व कर्मचारी या मोहिमेत सहभागी होतील, असा दावा प्रशासनाने केला आहे. त्यासाठी जिल्हा परिषद व पंचायत समितीअंतर्गत कार्यरत सर्व विभागप्रमुख, अधिकारी तसेच अधिनस्त सर्व कर्मचाऱ्यांना लेखी सूचना जारी करण्यात आल्या आहेत.

राज्य शासनाच्या निर्देशांचे पालन करत जिल्हा परिषद नाशिक प्रशासनाने या उपाययोजनांची जिल्हाभर प्रभावी अंमलबजावणी करण्यासाठी सर्व यंत्रणांनी समन्वयाने कार्य करावे, असे आवाहनही करण्यात आले आहे. कर्मचारी सार्वजनिक वाहनाने म्हणजे एसटी, शहर बसने आल्यास या उपक्रमातून इंधनाची मोठी बचत होईल. याशिवाय वाहतूक कोंडी टळेल तसेच प्रदूषणात घट होऊन शासकीय अधिकारी स्वतः सार्वजनिक वाहतुकीचा वापर करत असल्याचे पाहून समाजात सकारात्मक संदेश जाईल अशी आशा आहे.