Nashik News : गंगापूर रोडवरील प्रमोद महाजन उद्यानाच्या नुतणीकरणाचे काम पूर्ण झाल्याने हे उद्यान नाशिककरांसाठी खुले करण्यात आले होते. गुरुवारी २३ तारखेला भाऊबीजेच्या दिवशी विभागीय आयुक्त प्रवीण गेडाम, गायक सुरेश वाडकर आणि आमदार देवयानी फरांदे यांच्या उपस्थितीत या गार्डनचे लोकार्पण मोठ्या थाटामाटात झाले.
गार्डनमध्ये आमदार देवयानी फरांदे यांनी आयोजित केलेला भाऊबीज पहाट कार्यक्रम अतिशय उत्साहात पार पडला. सुप्रसिद्ध गायक पद्मश्री सुरेश वाडकर यांच्या सुरेल गायनाने वातावरण भारावून गेले. नाशिककरांनी मोठ्या संख्येने या कार्यक्रमासाठी हजेरी लावली होती. या उद्यानासाठी महापालिकेकडून निधी न मिळाल्याने आमदार देवयानी फरांदे यांनी खास शासनाकडून पाच कोटी रुपयांचा विशेष निधी उपलब्ध करुन घेतला व हे उद्यान नव्याने साकारले आहे.
परंतु लोकार्पण झाल्यानंतर तिसऱ्या दिवशीच हे गार्डन बंद ठेवण्याची वेळ आमदार फरांदे यांच्यावर आली आहे. (दि. २५) रोजी हे गार्डन बंद करण्यात आले. आमदार फरांदे यांनी स्वत:यासंदर्भात व्हिडीओ बनवून माहिती दिली आहे. देवयानी फरांदे म्हणाल्या की, दोन दिवसांपूर्वी आपण या उद्यानाचे लोकार्पण केलं व त्यानंतर दोन दिवस हे उद्यान पाहण्यासाठी व आनंद साजरा करण्यासाठी अबालवृद्धांनी एकच गर्दी केली. चार ते पाच हजार लोक एकाचवेळी उद्यानात आले होते. याचा मला आनंद झाला. परंतु काही दुर्भाग्यपूर्ण घटना घडल्यामुळे मला खंत आहे.
काही लोकांनी गार्डनची आणि त्यातील साधनांची हानी केली. चिमुकल्या मुलांच्या खेळण्यातून पालकांनी दुर्लक्षाने बसून काही नुकसान वाढवले. गेट व फेंस फोडून लोक आत प्रवेश करत होते. मी स्वतः जाऊन ते सर्व पाहिले आणि सुरक्षेबाबत महानगरपालिकेकडून तातडीने बंदोबस्त मागवला आहे. गार्डन काही दिवसांसाठी तात्पुरते बंद ठेवण्यात येत आहे अशी माहिती आमदार फरांदे यांनी दिली. महापालिकेकडून जोपर्यंत गार्डनच्या सुरक्षिततेची व्यवस्था होत नाही व दुरुस्ती झाल्याशिवाय गार्डन पुन्हा उघडणार नाही असा पवित्रा आमदार फरांदेंनी घेतला आहे.
आपल्या गार्डनची आणि बालकांची सुरक्षितता ही आमच्या प्राथमिकतेत आहे. जे कोणी नुकसान करतात ते सापडले तर कायदेशीर कारवाई केली जाईल असा इशाराही त्यांनी दिला. आमच्या सार्वजनिक वस्तूंना संवेदना दाखवूया, मुलांना शिक्षित करूया व एकमेकांचा आदर करूया..अशी विनंती आमदार देवयानी फरांदे यांनी नाशिककरांना केली. गार्डन काही दिवस बंद ठेवले जाणार असल्याचे त्यांनी सांगितले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.