RPI Athawale News: अभिनेते राहुल सोलापूरकर यांनी छत्रपती शिवाजी महाराज यांच्या विषयी वादग्रस्त विधान केले. त्याचे तीव्र पडसाद राज्यभर उमटत आहेत. मनमाड येथे आक्रमक कार्यकर्त्यांनी पोलिसांत कारवाईची मागणी केली आहे.
अभिनेते राहुल सोलापूरकर यांनी पुणे येथे एका वाहिनीला मुलाखत दिली. यामध्ये त्यांनी छत्रपती शिवाजी महाराज यांच्या विषयी आक्षेपार्ह विधाने केली. छत्रपती शिवाजी महाराज यांच्याशी संबंधित बहुतांशी घटना काल्पनिक असल्याचा दावा त्यांनी केला होता.
अभिनेते सोलापूरकर यांच्या या विधानावर तीव्र प्रतिक्रिया उमटली आहे. पुणे शहरातही त्यांच्या विरोधात जनक्षोभ आहे. त्यामुळे त्यांना पोलीस संरक्षण देण्यात आले आहे. मात्र राज्यात विविध ठिकाणी आंदोलन होत आहे.
या संदर्भात मालेगाव, मनमाड तसेच विविध ठिकाणी संतप्त कार्यकर्त्यांनी सोलापूरकर यांचा निषेध केला आहे. रिपब्लिकन पार्टी ऑफ इंडिया आठवले पक्षातर्फे मनमाड येथे मोठ्या संख्येने जमलेल्या कार्यकर्त्यांनी सोलापूरकर यांचा निषेध केला. यावेळी त्यांनी पोलीस ठाण्यात जाऊन निवेदन दिले.
श्री सोलापूरकर यांनी जे विधान केले आहे ते देशद्रोह म्हणून मानावे. त्यांच्यावर देशद्रोहाचा गुन्हा दाखल करावा, अशी मागणी यावेळी करण्यात आली. अभिनेते सोलापूरकर यांचे आजवरचे वर्तन आणि विचारसरणी दोन्हींचा विचार करता, त्यांनी जाणीवपूर्वक छत्रपती शिवाजी महाराजांचा अपमान करण्याचा प्रयत्न केलेला आहे.
छत्रपती शिवाजी महाराज यांना मानणारा सर्व वर्ग दुखावला आहे. त्याची शासनाने तातडीने दखल घ्यावी. सोलापूरकर यांच्याविरुद्ध कठोर कारवाई करावी. तसेच भांडारकर प्राच्य विद्या संशोधन मंदिर संस्थेचा विश्वस्त म्हणून सोलापूरकर यांनी केलेल्या कामाची चौकशी देखील करण्याची मागणी करण्यात आली. पक्षाचे जिल्हाध्यक्ष राजेंद्र अहिरे, गंगा दादा त्रिभुवन यांच्या नेतृत्वाखाली पोलीस ठाण्यात निवेदन दिले.
अभिनेते सोलापूरकर यांनी छत्रपती शिवाजी महाराजांच्या विषयी केलेल्या विधानाबद्दल दिलगिरी व्यक्त केली आहे. मात्र या विषयावरून वातावरण अद्याप शांत झालेले नाही. जळगाव सह विविध ठिकाणी राजकीय पक्षांकडून त्याचा निषेध केला जात आहे.
-----
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.