Eknath Khadse : 'चेकाळणे' शब्दावरुन चाकणकर विरुद्ध खडसे युद्ध भडकलं, खडसे म्हणाले अर्थ गुगलवर तपासा..

Maharashtra Politics : पुण्यातील खराडी येथे सुरू असलेल्या रेव्ह पार्टीत राष्ट्रवादी शरदचंद्र पवार पक्षाचे आमदार एकनाथ खडसे यांचे जावई प्रांजल खेवलकरांना अटक करण्यात आली. ते सध्या न्यायालयीन कोठडीत आहे. याप्रकरणात आता महिला आयोगाच्या अध्यक्षा रुपाली चाकणकर यांनी उडी घेतली आहे. चाकणकर यांनी पत्रकारपरिषद घेत एकनाथ खडसेंच्या जावयावर गंभीर आरोप केले आहेत. खेवलकर यांच्या मोबाईलमध्ये शेकडो अश्लील व्हिडिओ आणि फोटो असल्याचा आरोप चाकणकर यांनी केला.

चाकणकर यांच्या आरोपानंतर एकनाथ खडसे यांचा अधिकच संताप झाला. त्यांनी रुपाली चाकणकर यांच्यावर जोरदार हल्लाबोल केला. रुपाली चाकणकर या 'चेकाळल्या' आहेत, असे त्यांनी म्हटले. चेकाळल्या शब्दावरुन चाकणकर विरुद्ध खडसे यांच्यातील शाब्दिक युद्ध अधिकच भडकलं. यानंतर महायुतीकडून एकनाथ खडसे यांच्या विरोधात जोरदार आंदोलन करण्यात आले.

आता एकनाथ खडसे यांनी चाकणकर यांना उद्देशून केलेल्या वक्तव्यावर स्पष्टीकरण दिलं आहे. खडसे म्हणाले, 'चेकाळणे' या शब्दाचा अर्थ गुगलवर जाऊन एकदा तपासा. भाजपवाल्यांना महाराष्ट्रात राहून मराठीचा अर्थ समजत नसेल तर यांच्या बुद्धीची कीव येते. चेकाळणे शब्दाचा अर्थ आवेशाने, खवळणे असे अनेक अर्थ होतात. एकदा गुगलवर जाऊन ते पाहा. ज्यांना मी दूध पाजलं मोठं केलं, तेच माझ्या विरोधात आंदोलन करत आहेत, याचे खूप दु:ख होते अशी खंत खडसेंनी व्यक्त केली.

खडसे म्हणाले, रूपाली चाकणकर यांचा आदराने मी तेरा वेळा ताई असा उल्लेख केला, एकदा माझी प्रतिक्रिया नीट पाहा. किरीट सोमय्या यांचे नागडे फोटो दाखवले तेव्हा तुम्ही आंदोलन केले नाही, असा सवाल त्यांनी टीका करणाऱ्यांना व आंदोलन करणाऱ्यांना केला.

दरम्यान खडसेंनी मंत्री गिरीश महाजन यांच्याबाबत मोठा गौप्यस्फोट केला आहे. प्रफुल्ल लोढाकडे महाजन यांच्या अनेक सिड्या आहेत असा दावा खडसेंनी केला आहे. मला कशाला आंदोलन करत जोडे मारता, जोडेच मारायचे असतील तर ते गिरीश महाजन व प्रफुल्ल लोढा यांना मारा असे खडसेंनी म्हटलं आहे. विषारी पिल्लांना मी मोठं केलंय, याचा मला दुःख वाटतंय अस म्हणत खडसे यांनी महाजन यांच्यावर निशाणा साधला.