Nashik Loksabha constituency : नाशिकमधून लोकसभेला शड्डू ठोकणारे शांतिगिरी महाराज आहेत 'एवढ्या’ संपत्तीचे मालक!

Nashik, 26 April : शांतिगिरी महाराज यांनी आज नाशिक लोकसभा मतदारसंघातून अपक्ष उमेदवार म्हणून अर्ज दाखल केला. नाशिक मतदारसंघातून अपक्ष उमेदवारी अर्ज दाखल करणारे ते पहिले उमेदवार ठरले आहेत. कोणताही गाजावाजा न करता त्यांनी आज आपला अर्ज दाखल केला.

शांतिगिरी महाराजांनी मिरवणूक न काढता, शक्तिप्रदर्शन न करता नाशिक लोकसभेसाठी उमेदवारी अर्ज दाखल केला आहे. शांतिगिरी महाराज (Shantigiri Maharaj) यांचे गुरु मौनगिरी जनार्दन स्वामी यांचा जन्म अनुराधा नक्षत्रात झाला होता, त्यामुळे या मुहूर्तावर त्यांनी उमेदवारी अर्ज दाखल केला आहे. त्यांच्यासमवेत त्यांचे काही मोजके सहकारी होते.

अरुण शेठ पवार, गणेश पगार, राजाराम पानगव्हाणे उगाव, राजू इंगोले, संजय भास्करे असे मोजके सहकारी शांतिगिरी महाराज यांच्या समवेत होते, त्यांनी निवडणूक निर्णय अधिकारी जल्लोष शर्मा यांच्याकडे आपला उमेदवारी अर्ज दाखल केला.

शांतिगिरी महाराजांनी लोकसभा निवडणुकीची (Loksabha Election) जय्यत तयारी केली आहे. लोकसभा निवडणुकीत ते विशेष तयारीने यंदा उतरले आहेत. काही राजकीय पक्षांकडेही शांतिगिरी महाराजांनी उमेदवारी मागितली होती. पण त्यांना राजकीय पक्षाकडून उमेदवारी मिळू शकली नाही, त्या अपक्ष अर्ज दाखल केलेल्या शांतिगिरी महाराजांचा विजय निश्चित आहे, असा दावा त्यांच्या सहकाऱ्यांनी केला.

शांतिगिरी महाराज यांच्याकडे महाराष्ट्रातील 53 गावांमध्ये शेतजमिनी आहेत. विविध भक्तांनी दान केलेल्या जमिनींसह खरेदी केलेल्या जमिनींचाही यामध्ये समावेश आहे. या जमिनीचे एकूण मूल्य ३८.८७ कोटी आहे. नाशिक, छत्रपती संभाजीनगर, त्र्यंबकेश्वर, येवला यांसह विविध तालुक्यांतील या शेतजमिनी आहेत. त्यांचे क्षेत्रही लक्षणीय आहे.

ब्रह्मचारी असलेल्या शांतिगिरी यांचे शिक्षण निफाड तालुक्यात झाले आहे. ते दहावी उत्तीर्ण आहेत. त्यांच्याकडे काही लक्झरी नऊ वाहने आहेत. या वाहनांची किंमत ६७.९१ लाख आहे. त्यांचे विविध बारा बँकांमध्ये खाती आहेत. मात्र या खात्यांमध्ये लक्षणीय असे डिपॉझिट नाही. या खात्यांमध्ये अतिशय नगण्य शिल्लक आहे. त्यांच्याकडे ५० हजार रुपये रोख आहेत. याशिवाय २.४० लाखांची जीवन विमा पॉलिसी आहे.