Dead Teacher Appointed as Poll Officer : मयत शिक्षक मतदान अधिकारी, आयोग अन् प्रशासन निवडणुकीबाबत किती गंभीर?

State Election Commission Maharashtra : दुबार मतदार, बोगस मतदार, वोट चोरीमुळे केंद्रीय व राज्य निवडणूक आयोगाच्या कारभार नेहमीच वादात राहिला. विरोधक आजही यावर आक्रमक आहेत. नगरपालिकानंतर आता महापालिका निवडणुकीत हा मुद्दा अजूनही चर्चेत आहे.

यातच नाशिक जिल्ह्यातील मालेगाव महापालिकाने प्रशासनाने मतदान अधिकारी म्हणून मयत शिक्षकाची नियुक्ती केल्याने राज्य निवडणूक, प्रशासन किती गंभीर याचा, प्रत्यय आला आहे. या कारभारावरून महापालिकेच्या निवडणुका कशा पार पडणार, यावर चर्चा सुरू झाल्या आहेत.

मालेगाव (Malegaon) महापालिका निवडणुकीसाठी नांदगाव तालुक्यातील चार महिन्यांपूर्वी निधन झालेल्या शिक्षकाची थेट मतदान अधिकारी म्हणून नियुक्तीचा आदेश काढण्यात आल्याने प्रशासनाच्या कारभाराविषयी चर्चा सुरू झाली आहे. या नियुक्तीमुळे प्रशासन निवडणूक घेण्यासाठी खरचं सक्षम आहे का? असा प्रश्न केला जात आहे.

नांदगाव तालुक्यातील साकोरा इथल्या जिल्हा परिषद शिक्षक संतोष शिवाजी बोरसे यांचे चार महिन्यांपूर्वी निधन झाले आहे. असे असताना, मालेगाव महापालिकेच्या निवडणुकीसाठी केंद्र क्रमांक 48 वरील मतदान (Voter) पथकात चार शिक्षकांची नियुक्ती करताना मयत शिक्षकाचाही समावेश करण्यात आला आहे. हा आदेश पाहून तालुका पंचायत समितीच्या शिक्षण विभागासमोरच आता ‘हा आदेश नेमका कुणी आणि कसा अंमलात आणायचा?’ असा प्रश्न निर्माण झाला आहे.

मयत शिक्षकालाच निवडणूक कामावर पाठवण्याचा आदेश निघाल्याने, निवडणूक प्रक्रियेतील प्रशासनाच्या गांभीर्याची खिल्ली उडवली जात आहे. केवळ मयतच नव्हे, तर काही अपंग व अस्थिव्यंग शिक्षकांनाही अशाच प्रकारचे आदेश मिळाल्याचे समोर आल्याने या संपूर्ण प्रक्रियेतील बेफिकिरी चर्चेत आहे.

निवडणुकीसारख्या संवेदनशील आणि जबाबदारीच्या कामात, अशी चूक म्हणजे, प्रशासनाच्या अक्षम्य दुर्लक्षाचेच उदाहरण ठरत आहे. आदेश काढणे हा जणू एक औपचारिक सोपस्कार बनला असून, त्याची जबाबदारी मात्र तालुकास्तरीय यंत्रणेलाच उचलावी लागत असल्याने याबाबत आज दिवसभर चर्चेला उधाण आले होते.

सदर नियुक्तीचे आदेश महापालिकेचे मुख्य निवडणूक अधिकारी रवींद्र जाधव यांनी काढल्याचे स्पष्ट झाले असून, या प्रकरणाची गंभीर दखल घेऊन तातडीने सुधारणा करण्यात येणार असल्याचे सांगितले गेले.