Nashik News, 10 Jan : शिवसेना आणि मनसेचे संयुक्त सभा नाशिक महापालिका निवडणुकीसाठी झाली. या सभेत उद्धव ठाकरे यांनी भाजपवर अक्षरशा चहूबाजूंनी हल्ला चढवला. यावेळी भाजपच्या नेत्या आणि कार्यकर्त्यांच्या विवेकालाच त्यांनी आव्हान दिले.
महापालिका निवडणुकीसाठी उद्धव ठाकरे आणि राज ठाकरे यांची राज्यातील पहिली संयुक्त सभा नाशिकला झाली. या सभेला मोठी गर्दी होती. ठाकरेंच्या अपेक्षेपेक्षाही मोठी गर्दी झाल्याने त्यांनी प्रतिस्पर्धी भाजपवर अक्षरश: कार्पेट बॉम्बिंग केली.
राज ठाकरे यांनी नाशिकमध्ये सत्ता असताना मोठी कामे केली. आम्ही मुंबईत सामान्यांसाठी विकासाची कामे करून दाखवली. भाजपने काय केले? असा प्रश्न उपस्थित करत नाशिक शहराचे भविष्य उज्वल करण्यासाठी शिवसेना मनसेला मतदान करा, असे आवाहन केले.
ते म्हणाले, भाजपच्या नशिबी काय जीवन आले आहे? आमच्याकडे असल्यावर भ्रष्टाचाराचे आरोप करायचे. भाजपमध्ये घेण्यासाठी अगदी सलीम कुत्ता, बिल्ली, उंदीर काहीही चालते. आमदार देवयानी फरांदे या बाहेरच्या लोकांच्या प्रवेशावर रडल्या. सुधीर मुनगंटीवार यांनी भाजपची तुलना शनिशिंगणापूरशी केली. मात्र शनिशिंगणापूरला संकटग्रस्त जातात. भाजपमध्ये इडी, सीबीआयग्रस्त जातात.
राम मंदिराची भाषा करणारे मात्र रामाची सृष्टी उद्ध्वस्त करायला निघालेत. नाशिक मध्ये रामाचे वास्तव्य होते. तुमच्या पिढीला राम कुठे राहत होता? हे सांगताना काय नमो भवन आणि सरकारी गेस्ट हाऊस मध्ये राहत होता, हे सांगणार काय? असे म्हणत ठाकरे यांनी नाशिक करांच्या अस्मितेचा प्रश्न उपस्थित केला.
शिवसेनेला आता साठ वर्ष होत आहेत. आम्ही निवडणुकांमध्ये अनेक पराभव पाहिले, विजय आमच्या वाट्याला कमी आले. मात्र शिवसेना आहे तशीच टिकून आहे. ज्यांना आम्ही मोठे केले ते गेले, मात्र ज्यांच्या बळावर नेते मोठे झाले ते निष्ठावंत शिवसेना कार्यकर्ते आणि मतदार आजही शिवसेनेसोबत आहेत. त्याची साक्ष देणारी आजची सभा आहे. चोरून पाहणाऱ्या भाजपलाही त्याची जाणीव झाली असेल.
उद्धव ठाकरे यांनी या सभेत भाजपमधील दल बदलूना उमेदवारी हा मुद्दा हॅमर केला. भाजपच्या नेते आणि कार्यकर्त्यांवर हा अन्याय होत आहे. त्यांना तरी असा पक्ष चालणार आहे का? असा प्रश्न करीत एकाच वेळी भाजपच्या निष्ठावंतांना आवाहन आणि भाजप नेत्यांवर कार्पेट बॉम्बिंग करीत ठाकरे बंधूंची सभा यशस्वी करण्यात ते यशस्वी झाले.
या सभेसाठी स्थानिक नेत्यांनी मोठे परिश्रम घेतले होते. दत्ता गायकवाड, माजी आमदार वसंत गीते, जयंत दिंडे, जिल्हाप्रमुख डी. जी. सूर्यवंशी, महानगर प्रमुख प्रथमेश गीते यांसह विविध पदाधिकाऱ्यांनी या सभेसाठी परिश्रम घेतले. त्याचा उल्लेख ठाकरे बंधूंनी आवर्जून केला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.