Ajit Pawar : 'ॲक्टिव्ह व्हा', अजितदादांच्या सल्ल्यानंतर कार्यकर्त्यांमध्ये वेगळीच चर्चा

Ajit Pawar News: भाजपचे वर्चस्व असलेल्या नागपूर जिल्ह्यात राष्ट्रवादी काँग्रेसला विधानसभेच्या किती जागा मिळणार, महायुती कुठली जागा सोडणार याबाबत अनिश्चितता असताना उपमुख्यमंत्री अजित पवार यांनी राष्ट्रवादी काँग्रेसच्या कार्यकर्त्यांना आता गप्प बसून चालणार नाही, 'ॲक्टिव्ह व्हा' असा सल्ला दिला.

'ॲक्टिव्ह व्हा' असा सल्ला अजितदादांनी दिल्याने स्वबळावर लढायचे, अशी कुजबुज कार्यकर्त्यांमध्ये सुरू आहे.

वादग्रस्त वक्तव्यावरून महायुतीमध्ये मोठा वाद निर्माण झाला आहे. आरोग्यमंत्री तानाजी सावंत यांच्यासह राष्ट्रवादी काँग्रेसवर टीका करणाऱ्यांचा अजित पवार यांनी नागपूरमध्ये पाय ठेवताच समाचार घेतला. आम्ही बोललो तर तुम्हाला आवडेल का? आमचेही खालचे कार्यकर्तेसुद्धा काहीही बोलू शकतात असे सांगून त्यांनी मित्रपक्षाच्या नेत्यांना खेडे बोल सुनावले.

महायुती सरकारच्या मुख्यमंत्री लाडकी बहीण योजनेच्या कार्यक्रमाला उपस्थिती लावल्यानंतर अजित पवार यांनी राष्ट्रवादी काँग्रेसचे शहर अध्यक्ष प्रशांत पवार यांनी आयोजित केलेल्या बजाजनगर येथील शहर कार्यालयात घेण्यात आलेल्या कार्यक्रमाला हजेरी लावली.

यावेळी त्यांनी लोकसभेत विरोधकांनी संविधान बदलणार असलेल्या खोट्या नॅरिटिव्हला आता बळी पडू नका, असे आवाहन केले. जोपर्यंत सूर्य, चंद्र अस्तित्त्वात आहे तो पर्यंत बाबासाहेब आंबेडकरांचे संविधान कोणी बदलू शकत नाही, आरक्षण बदलू शकत नाही, मुस्लिमांना देशाबाहेर कोणी काढू शकत नाही असा विश्वास दिला.

आता विरोधकांच्या खोट्या नॅरेटिव्हला बळी पडू नका, असाही अजितदादांनी दिला. ओबीसी, मराठा, मागासवर्ग, मुस्लिम समाजासाठी महायुती सरकारने सुरू केलेल्या योजनांची माहिती देखील अजितदादांनी दिली.

पाच कलमी कार्यक्रम

राष्ट्रवादी काँग्रेसच्या कार्यकर्त्यांना आता गप्प बसून चालणार नाही, 'ॲक्टिव व्हा' अशी सूचना केली. अधिक जबाबदारीने कामे करण्याचा सल्ला दिला. राष्ट्रवादी युवक काँग्रेसला पाच कार्यक्रम देण्यात आले आहे. ते राज्यभरात राबवायचे आहेत. त्यात सर्वच पदाधिकाऱ्यांना सहभागी व्हायचे आहे असेही त्यांनी स्पष्ट केले. त्यांच्या या सल्ल्यानंतर राष्ट्रवादी काँग्रेस विधानसभेची निवडणूक स्वबळावर लढणार, अशी कुजबुज सुरू झाली.

यावेळी शहर अध्यक्ष प्रशांत पवार, जिल्हाध्यक्ष बाबा गुजर, श्रीकांत शिवणकर, सतीश शिंदे, राजेश माटे, विशाल खांडेकर आदी प्रामुख्याने उपस्थित होते.