Amit Shah : या कारणामुळे अमित शाहांचा गडचिरोली दौरा तडकाफडकी रद्द

Gadchiroli News : केंद्रीय गृहमंत्री अमित शहा यांचा गडचिरोली दौरा तडकाफडकी रद्द करण्यात आला आहे. दौरा अचानक रद्द झाल्याने अनेक तर्कवितर्क लावण्यात येत होते. याला पूर्णविराम देत खासदार अशोक नेते यांनी दौरा रद्द झाल्या बाबत खुलासा केला आहे.

आता केंद्र सरकारने आदिवासीबहुल गडचिरोली जिल्ह्याच्या विकासाकडे बारीक लक्ष देण्यास सुरुवात केली आहे. कोनसरी येथील लॉयड्स अँड मेटल एनर्जी कंपनीच्या 400 कोटी रुपये खर्चून बांधण्यात आलेल्या प्रकल्पाचे उद्घाटन आणि हजारो रुपये खर्चाच्या अन्य प्रकल्पांचे भूमिपूजन करण्यासाठी केंद्रीय गृहमंत्री अमित शहा 9 डिसेंबर रोजी गडचिरोलीत येणार होते. मात्र 9 डिसेंबरचा दौरा रद्द करून नंतरची तारीख जाहीर केली जाईल, अशी माहिती क्षेत्राचे खासदार अशोक नेते यांनी दिली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

केंद्रीय गृहमंत्री अमित शहा गडचिरोली जिल्ह्यात पोहोचल्यानंतर विविध प्रकल्पांचे उद्घाटन आणि भूमिपूजन करणार होते, ज्यामध्ये लॉयड्स अँड मेटल्स एनर्जी कंपनीच्या वतीने सुरजागढ टेकडीवर लोखंड उत्खनन आणि स्टील तयार करण्यासाठी चामोर्शी तालुक्‍यातील कोनसरी गावातील कोनसरीचा प्लांट 400 कोटी रुपये खर्चून बांधण्यात आला आहे.

केंद्रीय गृहमंत्री अमित शहा यांच्या हस्ते या प्लांटचे उद्घाटन होणार होते. याशिवाय फाउंडेशन स्टील फॉर पेलेट प्लांटचेही त्यांच्या हस्ते त्याच ठिकाणी उद्घाटन होणार होते. 1 हजार 888 कोटी रुपये खर्चून मंजूर झालेल्या वडसा-गडचिरोली रेल्वे मार्गाच्या बांधकामाचे भूमिपूजन याच कालावधीत ऑनलाइन होणार होते.

या कार्यक्रमाला राज्याचे मुख्यमंत्री एकनाथ शिंदे यांच्यासह उपमुख्यमंत्री देवेंद्र फडणवीस, उपमुख्यमंत्री अजित पवार यांचीही प्रमुख उपस्थिती राहणार असल्याचे सांगण्यात आले. मात्र काही महत्वपूर्ण कामांमुळे शाह यांना गडचिरोली दौरा पुढे ढकलावा लागल्याचे माहिती खासदार अशोक नेते यांनी दिली.