Buldhana politics : बुलढाण्यातील महायुतीमधील अंतर्गत राजकारण पुन्हा एकदा चर्चेत आले आहे. भाजपच्या आमदार श्वेता महाले आणि एकनाथ शिंदे यांच्या नेतृत्वाखालील शिवसेनेचे आमदार संजय गायकवाड यांच्यातील राजकीय वाद आता अधिक तीव्र झाला असून, या संघर्षाला कायदेशीर वळण मिळाले आहे.
आमदार गायकवाड यांच्याविरोधात विनयभंगाचा गुन्हा दाखल झालेला आहे. यानंतर आमदार श्वेता महाले यांनी आणखी दहा ते बारा महिलांच्या तक्रारी पोलिस महासंचालकांकडे देणार असल्याचे सांगितले आहे.
श्वेता महाले यांच्या या वक्तव्यानंतर बुलढाण्यातील भाजप (BJP) आणि शिवसेनेतील राजकीय संघर्ष आणखी वाढण्याची शक्यता निर्माण झाली आहे. स्थानिक पातळीवरील या वादाचे पडसाद आता वरिष्ठ पातळीवरही उमटण्याची शक्यता असून, महायुतीतील वरिष्ठ नेते या प्रकरणावर काय भूमिका घेतात, याकडे राजकीय वर्तुळाचे लक्ष लागले आहे.
काही दिवसांपूर्वी आमदार श्वेता महाले यांनी बुलढाण्यातील शिवसेनेच्या (Shivsena) महिला पदाधिकाऱ्यांना कोण मेसेज करतो, याची चौकशी झाली पाहिजे, असे वक्तव्य केले होते. त्यांच्या या वक्तव्याचा रोख आमदार संजय गायकवाड यांच्याकडे असल्याचे राजकीय वर्तुळात बोलले गेले. यानंतर आमदार संजय गायकवाड यांनी महाले यांच्या वक्तव्यावर प्रतिक्रिया देताना, आरोपांसाठी पुरावे सादर करावेत; अन्यथा महिलांची बदनामी करू नये, अशी भूमिका मांडली होती. या वादात शिवसेनेच्या महिला पदाधिकाऱ्यांनीही भूमिका घेतली. त्यांनी जिल्हाधिकाऱ्यांना निवेदन देत आमदार श्वेता महाले यांच्या वक्तव्याबाबत कारवाईची मागणी केली होती.
शिवसेनेच्या महिला पदाधिकाऱ्यांच्या भूमिकेनंतर आमदार श्वेता महाले यांनी आपल्या दाव्याबाबत अधिक माहिती दिली. त्यांच्या म्हणण्यानुसार, दहा ते बारा महिलांनी नाव गोपनीय ठेवण्याच्या अटीवर त्यांच्याकडे तक्रारी केल्या आहेत. या तक्रारी पोलिस महासंचालकांकडे देण्यात येणार असून, संबंधित महिलांना नेमके कोणते मेसेज करण्यात आले, ते कोणी केले आणि या मेसेजमागील नेमके प्रकरण काय आहे, याची चौकशी करण्याची मागणी केली जाणार असल्याचे महाले यांनी सांगितले. मात्र, या तक्रारींमधील आरोपांची स्वतंत्र अधिकृत पडताळणी अद्याप समोर आलेली नाही. त्यामुळे चौकशीनंतरच या प्रकरणातील वस्तुस्थिती स्पष्ट होणार आहे.
दरम्यान, महाले आणि गायकवाड यांच्यातील राजकीय वादाच्या पार्श्वभूमीवर बुलढाण्यात भाजप आणि एकनाथ शिंदे यांच्या नेतृत्वाखालील शिवसेनेच्या कार्यकर्त्यांमध्ये हाणामारी झाल्याचे समोर आले आहे. त्यामुळे स्थानिक पातळीवरील दोन्ही पक्षांमधील तणाव आणखी वाढला आहे. या पार्श्वभूमीवर आमदार श्वेता महाले यांनी भाजप, अजित पवार यांच्या नेतृत्वाखालील राष्ट्रवादी काँग्रेस आणि एकनाथ शिंदे यांच्या नेतृत्वाखालील शिवसेना यांच्यात चांगला समन्वय असल्याचा दावा केला. मात्र, एका व्यक्तीमुळे वातावरण खराब होत असल्याचे त्यांनी म्हटले.
पक्षश्रेष्ठींनी वारंवार समज दिल्यानंतरही काही लोक आपल्याच मस्तीत असतात. मीच मोठा आहे, अशा मानसिकतेत ते असतात. पक्षश्रेष्ठींनाही महत्त्व दिले जात नाही, असा टोला महाले यांनी नाव न घेता संजय गायकवाड यांना लगावला.
बुलढाण्यातील भाजप आणि शिवसेनेतील हा संघर्ष केवळ स्थानिक राजकारणापुरता मर्यादित राहतो की महायुतीच्या वरिष्ठ पातळीवर त्याची दखल घेतली जाते, हे महत्त्वाचे ठरणार आहे. एकीकडे दोन्ही पक्षांकडून परस्परांवर आरोप-प्रत्यारोप सुरू आहेत, तर दुसरीकडे कार्यकर्त्यांमधील संघर्षामुळे स्थानिक पातळीवरील वातावरण अधिक संवेदनशील झाले आहे. आता महाले यांच्या दहा ते बारा महिलांच्या तक्रारींच्या दाव्यावर पोलिस महासंचालकांकडून काय भूमिका घेतली जाते आणि महायुतीतील वरिष्ठ नेते बुलढाण्यातील या वादावर काय निर्देश देतात, याकडे लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.