Maharashtra Congress News: मोठी बातमी! 'होय, दुबार मतदारयादीत माझं नाव...'; काँग्रेस नेत्याचा धक्कादायक खुलासा

Nagpur News: सध्या दुबार मतदारावरून भाजप आणि काँग्रेसच्या नेत्यांमध्ये चांगलीच खडाजंगी सुरू आहे. काँग्रेसचे नेते राहुल गांधी यांनी भाजपचे माजी प्रदेशाध्यक्ष तसेच राज्याचे महसूलमंत्री चंद्रशेखर बावनकुळे (Chandrashekhar Bawankule) यांच्या कामठी विधानसभा मतदारसंघात बोगस मतदान झाल्याचा आरोप केला होता. त्यानंतर येथील काँग्रेसचे पराभूत उमेदवार सुरेश भोयर यांनीसुद्धा बोगस मतदानामुळे आपला पराभव झाल्याचा दावा त्यांनी केला होता.

मात्र, आता त्यांचेच नाव दुबार मतदारांच्या यादीत आढळले आहे. यावर भोयर यांनीसुद्धा हे मान्य केले आहे. आपले नाव मतदार यादीत दोनदा असल्याचे आढळले. ते कमी करण्यासाठी अर्ज केला होता. मात्र, त्यात दुरुस्ती करण्यात आली नाही. कामठी विधानसभा मतदारसंघात तब्बल 42 हजार मतदार बोगस असल्याचा दावाही त्यांनी केला.

भोयर म्हणाले, मी बावनकुळे यांच्या विरोधात कामठी विधानसभा मतदारसंघातून लढलो होते. त्यावेळी भाजपने बोगस मतदारांची नोंदणी केली असल्याचे ठाऊक नव्हते. राहुल गांधी या मुद्दा उपस्थित केल्याने याकडे सर्वांचे लक्ष वेधल्या गेले. त्यांच्याच आदेशानुसार आपण मतदारयाद्यांची (Voter List) पडताळणी करण्याचे ठरवले. त्यात मला माझे नाव दोनवेळा आढळून आले. लागेच एक नाव कमी करावे असा अर्ज संबंधित कार्यालयाकडे करण्यात आला होता. मात्र त्याची दखल घेण्यात आली नाही.

एवढेच नव्हे तर सुमारे 42 हजार बोगस मतदार आढळून आले आहे. ते वगळा यासाठी रामटेक लोकसभा मतदारसंघाचे खासदार श्यामकुमार बर्वे यांच्यामार्फत जिल्हाधिकाऱ्यांना पत्र देण्यात आले होते. त्यावरही कार्यवाही झाली नाही. जिल्हाधिकारी म्हणतात हे काम निवडणूक आयोगाचे आहे. मात्र, आयोगात काम करणारे सर्व कर्मचारी महसूल विभागाचे आहेत.

जिल्हाधिकारी जबाबदारी घ्यायला तयार नाही तर त्यांनी निवडणुकीशी सबंधित काम करणारे कर्मचारी कुठून आले हे सांगावे. लोकसभेनंतर पाच महिन्यांच्या अंतराने विधानसभेची निवडणूक झाली. पाच महिन्यात बेसा, हुडकेश्वर या भागात अचानक मतदारांच्या संख्येत सुमारे चाळीस हजाराने वाढ झाली.

पाच महिन्यात या परिसराचा असा कोणता विकास झाला, किती इमारती नव्याने उभ्या झाल्या की त्यामुळे हजारो मतदारांची भर पडली असा प्रश्न भोयर यांना निवडणूक आयोगाला केला. आम्ही सातत्याने मतदारयाद्या दुरुस्त करण्याची मागणी करीत आहोत. दुबार नावे काढण्यास सांगत आहोत. मात्र काहीच केले नाही. मतदारयाद्यांमध्ये घोळ कायम असताना नगर पालिका आणि नगर पंचायतीच्या निवडणुका जाहीर करण्यात आल्या असल्याचा आरोप सुरेश भोयर यांनी केला.