Dhananjay Munde: मुंडेंच्या राजीनाम्यावर फडणवीस काय निर्णय घेणार? मुनगंटीवार म्हणाले, 'कराडचा संबंध असेल तर...'

Nagpur News: राज्याचे अन्न व नागरी पुरवठा मंत्री धनंजय मुंडे यांच्या राजीनाम्याचा दबाव सरकारावर येऊ लागला आहे. आजपासून अधिवेशन सुरू होत असल्याने विरोधकही याच मुद्यावर सरकारला घेरणार असल्याचे दिसते. धनंजय मुंडे यांच्या पत्नी करुणा मुंडे यांनी राजीनाम्याचा निर्णय झाला असल्याचा दावा केला आहे. यावर भाजपचे ज्येष्ठ नेते व माजी मंत्री सुधीर मुनगंटीवार यांनीही भाष्य केले आहे.

मुनगंटीवार म्हणाले, "धनंजय मुंडे यांचा राजीनामा दोन दिवसात घेणार की नाही हे मला माहीत नाही. मात्र भाजप, महायुती आणि जनहितासाठी राजीनामा घेणे महत्त्वाचे आहे. यावर निर्णय घेण्यास मुख्यमंत्री देवेंद्र फडणवीस सक्षम आहेत. त्यांच्याकडे गृह खाते आहे. पोलिस विभागाने त्यांना या संदर्भात काही माहिती दिली असेल, याशिवाय कृषी घोटाळ्याच्या आरोपावर कृषी विभागाच्या सचिवांनी त्यांना काही पुरावे दिले असतील तर ते निश्चितच निर्णय घेतील,"

"धनंजय मुंडे यांच्यावर होणारे आरोप हे खरे असतील, त्यांचा आणि आरोपी वाल्मिक कराडचा संबंध असेल तर त्यांचा राजीनामा मुख्यमंत्र्यांनी घेणे गरजेचे आहे. आरोप खोटे असतील आणि त्यात काही तथ्य नसल्यास मुख्यमंत्र्यांनी याची माहिती सभागृहात द्यावी लागेल," असेही मुनगंटीवार यांनी सांगितले.

महायुतीचे सरकार स्थापन झाल्यापासून धनंजय मुंडे अडचणीत आले आहेत. याच काळात सरपंच देशमुख यांच्या हत्येचे प्रकरण घडले होते. हिवाळी अधिवेशन सुरू झाल्यनंतर एक रुपयात पिक विमा योजनेतील घोटाळ्याच्या विषय समोर आला होता. भाजपचे आमदार सुरेश धस यांनी हा घोटाळा सभागृहात उजागर केला होता.

विरोधकांनीही नंतर हा घोटाळा उचलून धरला. त्यानंतर अंजली दमानिया यांनी अनेक पुरावे सादर करून कसा घोटाळा घडला याची माहिती जगजाहीर केली होती. या संदर्भात मुंबई उच्च न्यायालयाच्या नागपूर खंडपिठातही याचिका दाखल करण्यात आली आहे. डीबीटी डावलून चढ्या भावाने कृषी साहित्य खरेदी केल्याचा आरोप धनंजय मुंडे यांच्यावर आहे.