Hinganghat Accident: स्वातंत्र्यदिनाच्या कार्यक्रमासाठी जाणाऱ्या तीन चिमुकल्या मुलींचा शाळेजवळच अपघाती मृत्यू

Wardha Accident News: देशभरात ८०वा स्वातंत्र्यदिन उत्साहात साजरा होत असतानाच वर्धा जिल्ह्यातील हिंगणघाट शहरातून दुर्दैवी घटना समोर आली आहे. आंबेडकर शाळेजवळ भरधाव खासगी ट्रॅव्हल्स बसने दुचाकीला मागून जोरदार धडक दिल्याने तीन चिमुकल्या शाळकरी मुली गंभीर जखमी झाल्या. रुग्णालयात उपचार सुरू असताना तिन्ही मुलींचा मृत्यू झाला. या घटनेमुळे हिंगणघाट शहरावर शोककळा पसरली आहे. समृद्धी धामसे, आरुही चवरे आणि मिसबा शेख* अशी या अपघातात मृत्यू झालेल्या मुलींची नावे आहेत.

दुचाकीला ट्रॅव्हल्सची जोरदार धडक

स्वातंत्र्यदिनाच्या कार्यक्रमासाठी तिन्ही मुली दुचाकीवरून जात होत्या. त्याचवेळी आंबेडकर शाळेजवळ त्यांच्या दुचाकीला मागून आलेल्या भरधाव ट्रॅव्हल्स बसने धडक दिली. धडक एवढी जोरदार होती की, तिन्ही मुली रस्त्यावर फेकल्या गेल्या आणि त्यांना गंभीर दुखापत झाली.अपघातानंतर परिसरातील नागरिकांनी तातडीने मदतीसाठी धाव घेतली. जखमी मुलींना उपचारासाठी जवळच्या रुग्णालयात दाखल करण्यात आले. डॉक्टरांनी त्यांच्यावर उपचार सुरू केले; मात्र प्रकृती गंभीर असल्याने उपचारादरम्यान तिन्ही मुलींचा मृत्यू झाला.

हिंगणघाटमध्ये हळहळ

स्वातंत्र्यदिनाच्या दिवशीच तीन शाळकरी मुलींचा अपघाती मृत्यू झाल्याची माहिती समोर आल्यानंतर हिंगणघाट परिसरात मोठी हळहळ व्यक्त होत आहे. आनंदाच्या वातावरणावर या दुर्घटनेने दुःखाचे सावट पसरले. घटनेची माहिती मिळताच पोलिसांनी अपघातस्थळी धाव घेतली. परिस्थिती नियंत्रणात आणत वाहतूक सुरळीत करण्यात आली. या दुर्घटनेचा पुढील तपास पोलिसांकडून सुरू आहे.

ट्रॅव्हल्स चालकाची चौकशी सुरू

अपघाताला कारणीभूत ठरलेल्या ट्रॅव्हल्स बसच्या चालकाविरोधात गुन्हा दाखल करण्याची प्रक्रिया सुरू असल्याची माहिती आहे. अपघात नेमका कशामुळे झाला, बसचा वेग किती होता आणि चालकाच्या निष्काळजीपणामुळे ही दुर्घटना घडली का, याचा तपास पोलीस करत आहेत. दरम्यान, या घटनेमुळे तीन कुटुंबांवर दुःखाचा डोंगर कोसळला असून, हिंगणघाट शहरातही शोक व्यक्त केला जात आहे.