Iran Vs USA, Israel War: नागपूरचे पर्यटक दुबईत अडकले! चिकटे अन् घारफेंडे कुटुंबातील 9 जणांची महाराष्ट्र सरकारकडं याचना; काय आहे परिस्थिती?

Iran Vs USA, Israel War: इराण विरुद्ध अमेरिका आणि इस्रायल यांच्यामध्ये युद्ध पेटलं असून सातत्यानं इराणकडून अमेरिकेच्या सैन्य स्थळांवर हल्ले केले जात आहेत. तसंच दुसरीकडं अमेरिका आणि इस्रायलकडून इराणमधील तेल शुद्धीकरण प्रकल्प टार्गेट करण्यात आले आहेत. अमेरिकेनं डागलेल्या एका क्षेपणास्त्र हल्ल्यात इराणचे सुप्रीम लीडर आयातुल्ला खामेनेई यांचा मृत्यू झाला आहे. त्यामुळं हे युद्ध भडकण्याच्या मार्गावर आहे. दरम्यान, दुबईत झालेल्या अनेक क्षेपणास्र हल्ल्यांनंतर खबरदारीचा उपाय म्हणून दुबईतील विमानतळं बंद करण्यात आली आहेत, त्यामुळं तिथं नागपूरचे ९ पर्यटक अडून पडले आहेत, या पर्यटकांनी महाराष्ट्र शासनं आणि केंद्र शासनाकडं मदतीची याचना केली आहे. त्याचबरोबर दुबईत सध्या नेमकी काय परिस्थिती आहे याची माहितीही दिली आहे.

इराण-अमेरिका, इस्रायलच्या युद्धाच्या पार्श्वभूमीवर दुबईत नागपूरचे चिकटे आणि घारफेंडे अशा दोन कुटुंबातील ९ जण अडकून पडले आहेत. हे सर्वजण एका ट्रॅव्हल एजन्सीच्यामार्फत पर्यटनासाठी दुबईला गेले होते. यांपैकी बबलू चिकटे यांनी व्हिडिओ बनवून आपलं कुटुंब दुबईत अडकून पडल्याची माहिती दिली आहे. तसंच महारष्ट्र सरकारकडं त्यांनी मदतीची याचना केली असून तिथली सध्याची परिस्थिती कशी आहे हे सांगताना सध्यातरी सर्व सोय एका हॉटेलमध्ये असली तरी आम्हाला लवकरात लवकर मायदेशी परतायचं आहे, असं साकडंही त्यांनी केंद्र सरकारला घातलं आहे.

अडकलेल्या पर्यटकांपैकी बबलू चिकटे म्हणाले, "नागपूरचे पर्यटक दुबईमध्ये अडकले आहेत. नागपुरची चिकटे आणि घारफेंडे कुटुंबातील 9 जण दुबईत अडकले आहेत. पर्यटनासाठी आखाती देशात गेल्यावर 3 मार्चला विमानाने परत यायचे होतं. मात्र, विमानतळ बंद केल्यानं आम्ही दुबई शहरात अडकून पडलो आहोत. हॉटेलमधून बाहेर जाण्यास पर्यटकांना मनाई करण्यात आली आहे. पण हॉटेलकडून नाश्ता, जेवणाची सोय उपलब्ध करून देण्यात आली आहे. नागपूर, अमरावती आणि यवतमाळ येथील 27 जण दुबईत आहेत. सातत्यानं इथं मिसाईलचे हल्ले होत असल्यानं सर्वत्र घबराटीचं वातावरण तयार झालं आहे, असंही बबलू चिकटे यांनी सांगितलं.