Sanjay Rathod Video : पालकमंत्र्यांच्या कारचा भीषण अपघात, एक जण गंभीर जखमी

Sanjay Rathod News : यवतमाळाचे पालकमंत्री आणि जलसंधारण मंत्री संजय राठोड यांच्या कारचा भीषण अपघात शुक्रवारी (ता.4) पहाटे दोनच्या दरम्यान कोपरा या गावात झाला. पोहरागड इथून यवतमाळकडे पालकमंत्र्यांचा ताफा जात असताना पालकमंत्र्यांच्या कारने पिकअपला मागून जोरदार धडक दिली. हा अपघात इतका भीषण होता की पीकअप जागेवर पलटी झाला आणि पालकमंत्र्यांच्या कारचा पुढील भागा चक्काचूर झाला.

या अपघातामध्ये पिकअपचालक गंभीर जखमी असल्याची माहिती आहे. संजय राठोड यांच्या कारचे एअर बॅग उघडल्याने सुदैवाने मंत्री संजय राठोड जखमी झाले नाहीत. मात्र त्यांचा चालक जखमी झाल्याची माहिती आहे. जखमींना रुग्णालयात उपचारासाठी दाखल करण्यात आले आहे.

मिळालेल्या माहितीनुसार,पोहरागड इथे उद्या (शनिवारी) पंतप्रधान मोदी,मुख्यमंत्री एकनाथ शिंदे यांच्या उपस्थितीत नंगारा म्युझियमचे उद्घाटन होणार आहे. त्याच्या तयारी अंतिम टप्प्यात असताना पहाटे दोन वाजून दहा मिनिटांनी पालकमंत्री संजय राठोड हे यवतमाळकडे येत असताना दिग्रस ते आर्णी मार्गावरील कोपरा या गावात त्यांच्या भरधाव कारने पीकअपला मागून जोरदार धडक दिली.

या अपघातामध्ये पीकअपमध्ये असलेली केळी रस्त्यावर पडली. पीकअपचालक गंभीर जखमी झाला. मंत्री संजय राठोड यांनी व्यापाऱ्याचा नुकसान होऊ नये म्हणुन रस्त्यावर पडलेली केळी दुसर्‍या वाहनात टाकून पोहरागड इथे पाठविल्याची माहिती आहे. तसेच जखमीला तत्काळ रुग्णालयात दाखल करण्यात आले.