Women Congress leadership: महापालिकेची निवडणूक तोंडावर, महिला शहर काँग्रेस अध्यक्षांना ठेवले होल्डवर

Nagpur News : विधानसभा निवडणुकीचा निकाल जाहीर झाल्यानंतर काँग्रेसमध्ये मोठे फेरबदल करण्यात आले. नाना पटोले यांच्याजागी हर्षवर्धन सपकाळ यांची प्रदेशाध्यक्षपदी नियुक्ती करण्यात आली. या यासोबतच महिला काँग्रेसची कार्यकारिणीसुद्धा बरखास्त करण्यात आली होती. शुक्रवारी महिला काँग्रेसची कार्यकारिणी जाहीर करण्यात आली. मात्र नागपूर शहराला होल्डवर ठेवण्यात आले आहे. नागपूर महापालिकेची निवडणूक तोंडावर असताना महिला काँग्रेसचे कामकाज तब्बल आठ महिन्यांपासून ठप्प पडले असल्याने कार्यकर्त्यांमध्ये मोठी अस्वस्थता निर्माण झाली आहे.

नाना पटोले प्रदेश काँग्रेसचे अध्यक्ष झाल्यानंतर नागपूर शहर महिला काँग्रेसच्या अध्यक्षही बदलण्यात आल्या होत्या. नॅश अली या युवा महिलेला शहराचे अध्यक्ष बनवण्यात आले होते. त्या मध्य नागपूरच्या विधानसभा मतदारसंघाच्या दावेदार मानल्या जात होत्या. शेवटपर्यंत त्यांचे नावही चर्चेत होते. तत्पूर्वी त्यांचा कार्यकाळ संपायच्या आतच नंदाताई पराते यांची मध्येच अध्यक्षपदी नियुक्ती करण्यात आली होती. त्यांनीसुद्धा मध्य नागपूरमधून विधानसभेकरिता दावेदारी केली होती. त्यामुळे आजी-माजी अध्यक्षांमध्ये येथ स्पर्धा सुरू होती.

मध्य नागपूरमध्ये हलबा समाज आणि मुस्लिम समाजाचे प्राबल्य आहे. हे बघता एका महिलेला काँग्रेस संधी देईल असाच अंदाज व्यक्त केला जात होता. मात्र मागील निवडणुकीत युवक काँग्रेसचे राष्ट्रीय महासचिव बंटी शेळके अवघ्या काही मतांनी पराभूत झाले होते. महाराष्ट्रातील विधानसभा तिकीट वाटपाच्या शेवटच्या टप्यात सर्व वाटाघाटी राहुल गांधी यांनी आपल्या हातात घेतल्या होत्या. बंटी शेळके यांचा रेकॉर्ड बघून पुन्हा त्यांनाच उमेदवारी देण्यात आली. विधानसभेच्या निवडणुकीत काँग्रेसचा (Congress) दारुण पराभव झाला.

त्यानंतर नाना पटोले (Nana Patole) यांना हटवण्यात आले. त्याचवेळी महिला काँग्रेसची कार्यकारिणीसुद्धा बरखास्त करण्यात आली होती. तेव्हापासून नागपूरमध्ये महिला अध्यक्ष व कार्यकारिणीच अस्तित्वात नाही. तब्बल आठ महिन्यानंतर महिला प्रदेशची कार्यकारिणी पक्षाने जाहीर केली. प्रदेशाध्यक्षपदी संध्या सव्वालाखे यांना पुन्हा नियुक्त करण्यात आले आहे. काही शहरांचे अध्यक्षही जाहीर करण्यात आले आहे. त्यात नागपूर शहराचा समावेश नाही.

नागपूर महापालिकेची निवडणूक जवळ आली आहे. भाजप व इतर पक्ष कामाला लागले आहेत. मात्र नागपूरमध्ये कार्यक्रमांचा काही ठावठिकाणा नाही. महिला काँग्रेसच्या राष्ट्रीय अध्यक्ष अलका लांबा यांनी सर्वांना सदस्य नोंदणी करण्याचे निर्देश दिले होते. नागपूरच्या अध्यक्ष नंदा पराते यांनी सर्वाधिक अकराशे सदस्यांची नोंदणी केली. ही नोंदणी प्रदेशाध्यक्षांनी केलेल्या सदस्य नोंदणीपेक्षा जास्त असल्याचा दावा केला जात आहे. असे असताना त्यांचेही नाव जाहीर करण्यात आले नाही.