MLC Election : नागपूर पदवीधरसाठी काँग्रेसकडून एक नाव फायनल : भाजपमध्ये तिघांची चर्चा; गडकरींच्या बंगल्यावर ठरला ‘धक्कातंत्रा’चा प्लॅन?

नागपूर पदवीधर मतदारसंघाच्या निवडणुकीत काँग्रेसने विद्यमान आमदार अभिजित वंजारी यांना पुन्हा मैदानात उतरवण्याची तयारी जवळपास निश्चित केली आहे. त्याचवेळी भाजपमध्ये मात्र उमेदवाराच्या नावावर अद्याप सस्पेन्स कायम आहे. भाजपकडून माजी आमदार सुधाकर कोहळे, अनिल सोले आणि मतदार नोंदणी उपप्रमुख सुधीर दिवे सुधीर दिवे या तीन नावांची चर्चा आहे.

रविवारी केंद्रीय मंत्री नितीन गडकरी यांच्या महाल येथील निवासस्थानी गडकरी यांच्या उपस्थितीत मुख्यमंत्री देवेंद्र फडणवीस आणि महसूलमंत्री चंद्रशेखर बावनकुळे यांच्यात झालेल्या बैठकीत या तिन्ही नावांवर चर्चा करण्यात आली. त्यानंतर मुख्यमंत्र्यांनी शहरातील भाजप आमदार आणि प्रमुख पदाधिकाऱ्यांशी स्वतंत्रपणे चर्चा करून संभाव्य उमेदवारांबाबत त्यांची मते जाणून घेतली.

नागपूर पदवीधर मतदारसंघ हा भाजपचा बालेकिल्ला मानला जात होता. मात्र 2020 मध्ये काँग्रेसच्या अभिजित वंजारी यांनी भाजपचे संदीप जोशी यांचा 18,910 मतांनी पराभव केला होता. त्यामुळे गमावलेली जागा पुन्हा मिळवण्यासाठी भाजपकडून जोरदार तयारी सुरू आहे. या पार्श्वभूमीवर उमेदवार निवडीचा निर्णय महत्त्वाचा मानला जात आहे.

भाजपमध्ये तीन नावांची चर्चा

भाजपकडून मतदार नोंदणी प्रमुख सुधाकर कोहळे, माजी आमदार अनिल सोले आणि मतदार नोंदणी उपप्रमुख सुधीर दिवे यांच्या नावांची चर्चा आहे. मात्र, यापैकी नेमका कोणता चेहरा निवडणुकीच्या मैदानात उतरवला जाणार, याबाबत पक्षाकडून अधिकृत घोषणा झालेली नाही. भाजप यावेळी चर्चेत असलेल्या नावांपैकीच उमेदवार देणार की पक्षाच्या नेहमीच्या निर्णयपद्धतीप्रमाणे अचानक वेगळ्या चेहऱ्याला संधी देणार, याबाबत उत्सुकता निर्माण झाली आहे.

गडकरींच्या बंगल्यावर खलबतं; ‘धक्कातंत्रा’ची चर्चा

नागपूर पदवीधर मतदारसंघ हा भाजपसाठी ऐतिहासिकदृष्ट्या महत्त्वाचा मतदारसंघ राहिला आहे. 1978 पासून 2020 पर्यंतच्या प्रदीर्घ कालखंडात जनसंघ आणि भाजपचे वर्चस्व होते. मात्र, 2020 मध्ये अभिजित वंजारी यांच्या विजयामुळे हे समीकरण बदलले. त्यामुळे यंदाची निवडणूक भाजपसाठी महत्त्वाची मानली जात आहे.

काँग्रेसकडून वंजारींचे नाव पुढे

दुसरीकडे काँग्रेसकडून विद्यमान आमदार अभिजित वंजारी यांचे नाव फायनल असल्याची माहिती आहे. त्यांच्या उमेदवारीला पक्षांतर्गत पातळीवर हिरवा कंदील मिळाल्याचे सांगितले जात आहे. त्यामुळे काँग्रेसच्या गोटात उमेदवाराबाबतचे चित्र भाजपच्या तुलनेत अधिक स्पष्ट असल्याचे दिसत आहे. आता ६ ऑक्टोबर रोजी उमेदवारी अर्ज दाखल करण्याच्या अंतिम मुदतीपर्यंत भाजप कोणता चेहरा पुढे करते, याकडे राजकीय वर्तुळाचे लक्ष लागले आहे.